शिक्षा, विज्ञान तथा प्रविधिमन्त्री गिरिराजमणि पोखरेलले अनलाइन प्रणाली मार्फत् शिक्षा प्रदान गर्ने विषयमा विभिन्न विश्वविद्यालयका उपकुलपतिसँग छलफल गर्नुभएको छ ।
भिडियो कन्फरेन्समार्फत मन्त्री पोखरेलले त्रिभुवन, सुदूरपश्चिम, काठमाडौँ, मध्यपश्चिम, पोखरा, र खुल्ला विश्वविद्यालयका उपकुलपतिसँग सो संवाद गर्नुभएको हो ।
मन्त्री पोखरेलले हालको विषम स्थितिमा विश्वविद्यालयले गरिरहेको काम र भावी दिनको तयारीबारे जानकारी लिई सूचना प्रविधिका माध्यमबाट भर्चुअल कक्षा सञ्चालनका लागि पनि तयार रहन निर्देशन दिनुभएको मन्त्री पोखरेलका स्वकीय सचिव पुरन केसीले बताउनुभयो ।
कोभिड-१९ को महामारी रोकथाम र नियन्त्रणका लागि लकडाउन जारी भएपछि अनलाइन, टेलिभिजन र रेडियो आदिमार्फत् पढाउने तयारी भइरहेको शिक्षामन्त्री पोखरेलले जानकारी दिनुभयो । संकटका बेला पनि सिक्न पाउने अधिकार सुनिश्चित गर्ने गरी पढाउने तयारीमा लागेको उहाँको भनाई छ । त्रिभुवन विश्वविद्यालय, स्कूल अफ म्यानेजमेन्टले एमबीए र एमफिल तहको अनलाइन कक्षा सुरु गरिसकेको छ ।।