काठमाडौं ।
शुक्रबारदेखि संघीय संसदको बैठक सुरु हुँदै छ । बैठक सुरु गर्नुअघि सरकारले सबै साँसद तथा कर्मचारीको कोरोना भाइरस परीक्षण गरेको छ । बिहीबार २०३ जना सांसदसहित ४३३ जनाको कोरोना परीक्षण गरिएको छ ।
संघीय संसद भवनको ल्होत्से हलमा बिहान १० बजेदेखि सुरु भएको परीक्षणमा प्रतिनिधि सभातर्फका १७० जना र राष्ट्रिय सभातर्फका ३३ जना सांसद सहभागी भएका संसद सचिवालयले जनाएको छ ।
सचिवालयका अनुसार प्रतिनिधि सभामा २७५ जना छन् । राष्ट्रिय सभामा हाल ५८ जना छन् । बिहीबार स्वाब संकलनमा छुटेका सांसदको शुक्रबार बिहान साढे ८ बजेदेखि परीक्षण गरिने भएको छ ।
संकलित स्वाब परीक्षणका लागि आजै टेकुको राष्ट्रिय जनस्वास्थ्य प्रयोगशाला पठाइएको छ । स्वावको परीक्षण रिपोर्ट शुक्रबार दिउँसोसम्म आउने जनाइएको छ । रिपोर्ट आएपछि मात्रै सांसदहरु बैठक कक्षमा प्रवेश गर्न पाउनेछन् । भोलिबाट संघीय संसदको वर्षे अधिवेशन सुरु हुँदैछ । दिउँसो ४ बजेलाई बैठक बोलाइएको छ ।
