काठमाडौं । बन्दावन्दी (लकडाउन) आदेश जारी भएपछि बैंकिङ प्रणालीमा ९८ अर्ब रुपैयाँ निक्षेप बढेको छ । गएको चैत ११ देखि वैशाख मसान्तसम्म सो रकम निक्षेप परिचालन बढेको हो ।
लकडाउनकाबीचमा विदेशबाट रेमिट्यान्स आप्रवाह भएका कारण पनि निक्षेप बढेको नेपाल राष्ट्र बैंकका प्रवत्ता डा. गुणाकर भट्टले बताए । उनले यसबीचमा लगानीमा रहेको कर्जा २० अर्ब रुपैयाँले बढेको उनले जानकारी दिए ।
जारी लकडाउनमा पनि बैकिङ कारोबार भइरहेकाले निक्षेप परिचालन र कर्जा लगानी बढेको उनले सुनाए । बीचमा केही दिन कर्जा प्रवाह हुन थालेपछि तरलता घटेर २८ अर्ब रुपैयाँ झरेको थियो ।
हाल बैंकिङ प्रणालीमा झण्डै ५१ अर्ब रुपैयाँ अधिक तरलता रहेको प्रवत्ता भट्टले जानकारी दिए । यसबीचमा केही सरकारी खर्च बढेकाले तरलता माथि पुगेको उनको भनाई छ । अहिले बैकिङ क्षेत्र तरलताको सहज अवस्थामा रहेको उनको भनाई छ ।
