रसुवाको सदरमुकाम धुन्चे सहित उत्तरी क्षेत्रमा खाद्यान्नको मौज्दात कमी भएसंगै खाद्यान्न अभाब देखिन थालेको छ । जिल्ला सदरमुकाम धुन्चे तथा दुई वटा गाँउपालिकाको केन्द्र रहेको स्याफ्रुबेशीमा खाद्यान्नको मौज्दात कमी भए सँगै खाद्यान्न अभाब देखिन थालेको हो ।
अब सदरमुकाम धुन्चे लगायत उत्तरी क्षेत्रमा करिब एक साताका लागि मात्र पुग्ने खाद्यान्न रहेको स्थानीय ब्यापारीहरुले बताएका छन् । ८ सय बोरा चामल, ७८ बोरा दाल, दुई सय २० बाकस तेल, ७८ बोरा नुन र ७२ वटा ग्यास मौज्दात रहेको तथ्याङ्क दिएको चेम्बर अफ कर्मस रसुवा तथा उद्योग बाणिज्य संघ रसुवाले जनाएको छ ।
लकडाउनको समयमा गाँउमा मानिसहरुको संख्या बढेसँगै खाद्य सामाग्रीको खपत पनि बढेको ब्यापारीहरुको भनाई छ । जिल्ला सदरमुकाम तथा दुईवटा गाँउपालिकामा करिब १६ हजार मानिस बसोबास गर्दैै आएका छन् । धुन्चे तथा स्याफ्रुबेशीमा गरि जम्मा सात वटा होलसेलका पसल रहेको छ ।
आलुको उत्पादन बढी हुने तर धान र मकैको उत्पादन भने कमी हुने हुँदा यस क्षेत्रका बासिन्दाहरुले बढी मात्रामा खाद्यान्न किनेरै गुजारा गर्ने गरेका छन् ।