• फाइल फोटो

काठमाडौं, १३ असोज । सरकारले दशैं, तिहार लगायत चाडपर्वलाई लक्षित गर्दै यस वर्षको सुपथ मूल्य पसल आगामी बिहीवार (असोज १५) गतेदेखि सञ्चालन गर्ने भएको छ । उद्योग, वाणिज्य तथा आपूर्ति मन्त्रालयले सोमवार उक्त निर्णय गरेको हो, जसअनुसार सरकारी स्वामित्वका खाद्य व्यवस्था तथा व्यापार कम्पनी लिमिटेड, साल्ट ट्रेडिङ कर्पोरेशन र दुग्ध विकास संस्थानले असोज १५ देखि आगामी मङ्सिर ६ गतेसम्म सुपथ मूल्य पसल सञ्चालन गर्नेछन् ।

काठमाडौं उपत्यकामा खाद्य व्यवस्था तथा व्यापार कम्पनी र साल्ट ट्रेडिङ कर्पोरेशनले पाँच÷पाँच स्थानका साथै दुग्ध विकास संस्थानले तीन स्थानमा यस्तो पसल सञ्चालन गर्ने भएका छन् । सुपथ मूल्य पसलमा खाद्य व्यवस्था तथा व्यापार कम्पनी लिमिटेडले चामल, दाल, कर्णालीको सिमी, फापर, खानेतेल, आटा स्यानिटाइजर, इन्डक्शन चूलो, खसीबोकालगायत, साल्ट ट्रेडिङले चिनी, नून र दुग्ध विकास संस्थानले घीउ, पनिरलगायत खाद्यवस्तु विक्री गर्ने बताइएको छ ।

खाद्य व्यवस्था कम्पनीले काठमाडौं उपत्यकाका थापाथली, रामशाह पथ, लगनखेल, सूर्यविनायक र नक्खु विक्री केन्द्रमार्फत खाद्यवस्तु विक्री गर्ने भने साल्ट ट्रेडिङले घुम्ती पसलसमेत सञ्चालन गर्ने निर्णय भएको छ । यस्तै उपत्यकाबाहिर करीब १६ स्थानमा सुपथ मूल्य पसल सञ्चालन गर्ने निर्णय भएको बताइएको छ ।