१ असार, काठमाडौं । नेकपा माओवादी केन्द्रका नेता नारायणकाजी श्रेष्ठले निर्वाचन आयोगलाई सरकारको कठपुतली भएको आरोप लगाउनुभएको छ।
मंगलबार सामाजिक संजालमा अभिव्यक्ति दिँदै जसपा विवादमा न्यायसंगत निर्णय नगरेकोतिर इङ्गित गर्दै उहाँले यस्तो आरोप लगाउनुभएको हो।
उहाँले लेख्नुभएको छ, ‘निर्वाचन आयोग सरकारको कठपुतली भई कानुन र लोकतन्त्रको धज्जी उडाउने काम गरिरहेछ । संवैधानिक आयोगको यस्तो कार्य लज्जास्पद र भर्त्सनायोग्य छ । जसपा बारेको पछिल्लो निर्णयमा यो स्पष्ट भएको छ । नेकपाको बारेमा पनि यस्तै गरिएको थियो’
त्यस्तै नेता श्रेष्ठले अहिलेको राजनीतिक अस्थिरता र संकटको कारण निर्वाचन आयोगको नेकपासम्बन्धी निर्णय पनि भएको बताउनुभयो ।
उहाँले भन्नुभयो, ‘राजनीतिक पार्टीहरुले पनि आफ्नो प्रत्यक्ष स्वार्थ वा हितसँग नजोडिँदासम्म नबोल्ने वा तमासे बन्ने स्थिति अन्त्य गर्नुपर्छ । लोकतन्त्र पक्षधर सबै मिलेर संवैधानिक अङ्गको यसप्रकारको गलत कार्यलाई समयमै रोकिहाल्नु पर्छ’
