काठमाडौँ, ३ असोज । नेपाली काँग्रेसका नेता दिलबहादुर घर्तीले आसन्न निर्वाचनमा आफ्नो कुनैपनि पदमा उम्मेदवारी नरहेको बताउनुभएको छ ।
नेता घर्तीले आइतबार फेसबुकमार्फत एक सन्देश जारी गरी आगामी मंसीर ४ गते हुन लागेको प्रदेशसभा तथा प्रतिनिधीसभा निर्वाचनमा आफू कुनैपनि पदमा उम्मेवारी नदिएर त्याग र निष्ठा देखाउनुभएको हो ।
“नेपाली काँग्रेस लमजुङ जिल्ला कार्यसमितिको मिति २०७९ भदौ १७ गते प्रतिनिधि सभा निर्वाचन उम्मेदवार सिफारिस सम्बन्धमा बसेको बैठकमा प्रत्यक्ष र समानुपातिक तर्फ मेरो कुनै पनि उम्मेदवारी नरहेको सम्पूर्ण साथीहरूलाई जानकारी गराउँछु,”– नेता घर्तीले भन्नुभएको छ ।
उहाँले आगामी निर्वाचनमा नेपाली काँग्रेसका उम्मेदवार र गठबन्धनका उम्मेदवारलाई विजयी गराउन आफू सक्रिय रुपमा लाग्ने बताउनुभएको छ । काँग्रेस नेता घर्तीले सम्पूर्ण साथीहरूलाई सक्रिय एवम् उत्साहपुर्वक रूपमा नेपाली काँग्रेसको नेतृत्वमा भएको गठबन्धनलाई विजयी गराउन हार्दिक अनुरोध समेत गर्नुभएको छ ।
