काठमाडौँ, १३ कात्तिक । काठमाडौँको ठमेलमा रहेको चारतारे होटल रमदा इन्कोरमा स्पा सञ्चालनमा आएको छ ।
डालिया इनभेष्टमेन्ट कम्पनी र गैरआवासीय नेपाली सङ्घ (एनआरएनए) को लगानीमा ठमेलमा सञ्चालित ‘रमदा इन्कोर बाई वाईनहेम काठमाडौँ’मा स्पा सञ्चालनमा आएको हो ।
नयाँ सञ्चालनमा आएको स्पाको नाम ‘जेन स्पा’ राखिएको छ । जेन स्पाले विगत एक दशकदेखि स्पा सञ्चालन गरिरहेको छ । उक्त गुप्रले रमदा होटल व्यवस्थापनको सहकार्यमा रमदामा स्पा सञ्चालनमा ल्याएको हो ।
जेन स्पाकी सञ्चालक विना सिंखडाले वडि टिटमेन्ट एक घण्टाको ५ हजार ६००, वडि थेरापी एक घण्टाको ५ हजार ६०० र फेस थेरापी एक घण्टाको ४ हजारमा गर्न सकिने जानकारी दिनुभयो । उक्त स्पामा हाल एकैपटक चारजना ग्राहकले सेवा प्राप्त गर्न सक्नेछन् ।
रमदा होटलका महाप्रबन्धक महेश फुँयालले स्पा सञ्चालनमा आएसँगै होटलमा आउने पाहुना वडी मसाजका लागि अन्य स्थानमा जानुपर्ने बाध्यताको अन्त्य भएको बताउनुभयो ।
अमेरिकाको रमदा इन्कोर बाई वाईनहेमको चेन होटलका रुपमा स्थापना भएको रमदा काठमाडौँमा ९० कोठा रहेका छन् । उक्त होटल काठमाडौँ महानगरपालिका वडा नं १६ ठमेलमा सञ्चालित छ ।
