काठमाडौं। नेकपा माओवादी केन्द्रबाट बागी उम्मेदवारी दिएका चार जना प्रदेश सभा सांसद तत्काल पार्टीमा नफर्किने भएका छन् । पार्टी र सत्ता गठबन्धनमा असन्तुष्टि जनाउँदै स्वतन्त्र उम्मेदवारी दिएका चारै जना स्वतन्त्र सांसदको रूपमा रहने बताएका हुन् ।

रुकुम पूर्वको प्रदेश सभा ‘क’ बाट निर्वाचित अजयशक्ति सरुल पुनमगर, रोल्पा प्रदेश सभा‘ख’बाट निर्वाचित दीपेन्द्र पुनमगर, पश्चिम नवलपरासी क्षेत्र नम्बर २ प्रदेश सभा ‘क’बाट निर्वाचित खड्ग बस्नेत र सर्लाही क्षेत्र नम्बर ३ प्रदेश सभा ‘क’बाट जबाहरलाल कुशवाह निर्वाचित भएका थिए । यसरी पार्टी र सत्ता गठबन्धनलाई समेत चुनौती दिँदै माओवादीका चार नेताले प्रदेश सभा सांसदमा जितेका हुन् ।

आफ्नो पुरानो पार्टीसहित सबै मतदाताले भोट दिएकाले तत्काल पार्टीमा नफर्किने नवलपरासी २ प्रदेश सभा ‘क’बाट निर्वाचित खड्ग बस्नेतले बताए ।

यस्तै रोल्पा प्रदेश सभा ‘ख’बाट निर्वाचित दीपेन्द्र पुनले देशैभर स्वतन्त्र रूपमा निर्वाचित प्रदेश सभा सदस्यहरूसँग कुरा भइरहेको बताए । सबै स्वतन्त्र जितेका सांसदहरु र मतदातासँग सल्लाह गरेर पार्टीमा फर्किने/नफर्किने निर्णय गर्ने पुनले बताए । अहिलेकै अवस्थामा माओवादीमा फर्किने अवस्था नरहेको बताए । आफ्नो पुरानो पार्टीले समेत आफूलाई पार्टीमा भित्र्याउन कुनै पहल नगरेको पुनको भनाइ छ ।