काठमाडौं । नेपाली क्रिकेट खेलाडी पहिलोपटक ‘स्पट फिक्सिङ’ काण्डमा मुछिएका छन् ।
नेपाल टी–ट्वान्टी लिग क्रिकेटमा ‘स्पट फिक्सिङ’ गरेको आरोपमा केन्द्रीय अनुसन्धान ब्यूरोले दुई जना खेलाडी पक्राउ गरेको छ । ब्यूरोले सोमबार राष्ट्रिय क्रिकेट टोलीका सदस्य आदिल अन्सारी र पूर्व राष्ट्रिय खेलाडी मेहबुव आलमलाई पक्राउ गरेको हो ।
दुई साताअघि सम्पन्न विवादास्पद लिगलाई क्रिकेट लाइभ बेटिङ, स्पट फिक्सिङ, म्याच फिक्सिङ, पारिश्रमिक विवाद र आयोजकमध्येको एक पक्ष फरार प्रकरणमा गृह मन्त्रालयले छानबिन गर्न सीआईबीलाई निर्देशन दिएको थियो । प्रारम्भिक अनुसन्धानपछि दुई क्रिकेटर पक्राउ परेका हुन् ।
ब्युरोका एक अधिकृतका अनुसार स्पट फिक्सिङमा विदेशी खेलाडीहरूसहित अन्य खेलाडीको पनि संलग्नता देखिएको छ । ति अधिकारीले भने-‘दर्जनभन्दा बढी खेलाडी शंकाको घेरामा छन्, त्यसमध्ये प्रत्यक्ष संलग्न भएको प्रमाणकै आधारमा साेमबार दुइ खेलाडी समातिएका हुन् । उनीहरूसँग जोडिएका अरू पनि हुन सक्छन् ।’
स्पट फिक्सिङबारे जानकारी गराउन केन्द्रीय अनुसन्धान ब्युरोले पत्रकार सम्मेलन आयोजना गरेको छ । मंगलबार दिउँसो पत्रकार सम्मेलन गरेर त्यसबारे जानकारी गराइने केन्द्रीय अनुसन्धान ब्युरोले जनाएको छ ।
