काठमाडौँ । नवनिर्वाचित राष्ट्रपति रामचन्द्र पौडेलले सोमबार-आज पद तथा गोपनीयताको शपथ ग्रहण गर्दैछन् ।
शितलनिवासमा आज दिउँसो १ बजे आयोजना हुने विशेष समारोहमा नवनिर्वाचित राष्ट्रपति पौडेलले शपथ ग्रहण गर्न लागेका हुन् । कायम मुकायम प्रधानन्यायाधीश हरिकृष्ण कार्कीले राष्ट्रपति पौडेललाई शपथ ग्रहण गराउने कार्यक्रम रहेको छ ।
फागुन २५ गते राष्ट्रपति पदमा निर्वाचित भएका नेपाली कांग्रेसका वरिष्ठ नेता पौडेलले प्रतिस्पर्धी नेकपा (एमाले)का उपाध्यक्ष एवं पूर्वसभामुख सुवासचन्द्र नेम्वाङलाई दोब्बर ल्याई विजयी भएका थिए । पौडेलले ३३ हजार ८ सय २ मत ल्याउँदा नेम्वाङले १५ हजार पाँच सय १८ मत प्राप्त गरेका थिए ।
राष्ट्रपतिको पदावधि ५ वर्ष हुन्छ भने दुई पटकसम्म मात्रै राष्ट्रपतिको उम्मेदवार हुन पाउने व्यवस्था रहेको छ ।
पहिलो राष्ट्रपति डा. रामवरण यादव र दोस्रो राष्ट्रपति विद्यादेवी भण्डारी पछि पौडेल नेपालको तेस्रो राष्ट्रपति हुन् ।
