काठमाडौँ । नवौँ महर्षि म्याराथन प्रतियोगिताको उपाधी सुरज तामाङ र भावना नाथले प्राप्त गर्नुभएको छ ।
काठमाडौँ महानगरपालिका वडा नं २६ स्थित सामाखुशीमा सञ्चालित महर्षि स्कुलले प्रत्येक वर्ष सञ्चालन गर्ने म्याराथनको आज भएको दौडमा पुरुषतर्फ महर्षि स्कुलका सुरज तामाङ र महिलातर्फ विजेश्वरी सैनिक विद्यालयकी भावना नाथले प्राप्त गर्नुभएको हो ।
यस्तै, पुरुषतर्फ दोस्रो महर्षिकै आयुष कोइराला र तेस्रोमा कौशल स्कुलका सुगम भण्डारी हुनुभएको छ । महिलातर्फ दोस्रो विजेश्वरी सैनिक विद्यालयकी प्रकृति बस्नेत र तेस्रो ल्याण्डमार्क एकेडेमीकी सगुनी देवकोटा हुनुभएको छ ।
पुरुषतर्फ प्रथम सुरजले म्याराथनअन्तर्गत ५ किलोमिटर दौड १६ मीनेट ५७ सेकेण्डमा पुरा गर्नुभएको थियो भने महिलातर्फ प्रथम भावनाले ३ किलोमिटर दौड १० मीनेट २० सेकेण्डमा पुरा गर्नुभएको थियो ।
प्रतियोगिताका विजयी पहिलो, दोश्रो र तेश्रो हुने खेलाडीहरुले क्रमशः रु ६ हजार, चार हजार र तीन हजार नगदका साथै मेडल र प्रमाणपत्र प्रदान गरिएको थियो ।
विद्यार्थीहरु मानसिक र शारिरीक रुपमा स्वस्थ रहेमा राष्ट्र निर्माणमा योगदान पुग्छ भन्ने भावनालाई मूर्तरुप दिन स्कुलले आफ्नो बार्षिकोत्वस तथा अभिभावक दिवसका अवसरमा खेलकुद कार्यक्रमको आयोजना गर्दै आएको स्कुलका अध्यक्ष प्रकाशचन्द्र दवाडीले जानकारी दिनुभयो । म्याराथनमा झण्डै दश विद्यालयका ६० भन्दा बढी विद्यार्थीको सहभागीता रहेको थियो ।
