काठमाडौं । नेपाल–भारतबिच आजदेखि अन्तर्देशीय ‘डिजिटल क्युआर पेमेन्ट’ सेवा सुरु भएको छ । यससँगै नेपालमा आउने भारतीय नागरिकले क्युआर मार्फत नेपालमा डिजिटल भुक्तानी गर्न सक्ने भएको हो ।
राष्ट्र बैंंकका अनुसार भारतबाट नेपाल आउने सेवाग्राहीले नेपालमा फोन पे मार्फत क्युआर गर्न सक्नेछन् । यसका लागि भारतीय नागरिकको भारतका बैंकमा खाता हुनुपर्नेछ । सोअनुसार भारतीय बैंकका क्युआरमार्फत नेपालको फोन पे मा क्युआर गरेर भुक्तानी गर्न मिल्ने छ ।
यद्यपि, यो सेवा सीमित रूपमा मात्रै चल्ने छ ।
भारतका १० वटा बैंकका ग्राहकले नेपालमा क्युआर मार्फत भुक्तानी गर्न मिल्ने फोन पे का प्रमुख कार्यकारी अधिकृत दिवस सापकोटा बताउँछन् ।
उनले १३ वटा बैंकले क्युआरमार्फत भुक्तानीका लागि प्रस्ताव पठाइसके पनि ३ वटाको प्रस्तावलाई ‘इनएबल’ गर्न बाँकी रहेको बताए । यो सुरुवात भएकाले भावी दिनमा थप बैंकबाट नेपालमा क्युआर गर्न मिल्ने बनाउने उनको भनाई छ ।
