२४ साउन, काठमाडौं । राष्ट्रियसभाकी सांसद नन्दा चपाईले सुर्खेतमा प्रसुती गृह अस्पतालको तत्काल व्यवस्था गर्न सरकारसँग माग गर्नु भएको छ ।
आईतबार राष्ट्रियसभाको बैठकमा बोल्दै उहाँले अकालमा दूर्गम क्षेत्रका धेरै गर्भवतीहरुले ज्यान गुमाउनु परेको उल्लेख गर्दै सुर्खेतमा तत्काल प्रसुती गृह अस्पतालको निर्माण गर्न सरकारको गम्भिर ध्यानाकर्षण गराउनु भएको हो । सांसद चपाईले निःशुल्क पाइने औषधिहरुको सूचि आम जनताले थाहा पाउने गरी सार्वजनिक गर्न पनि सरकारलाई सचेत गराउनुभयो ।
उहाँले भन्नु भयो, ‘केही औंषधिहरु निःशुल्क पाईन्छ भन्ने सुनिन्छ । तर कहाँ र कसरी पाईन्छ ? जनतालाई जानकारी छैैन । भएका निःशुल्क पाईने औंषधिहरु पनि समय अवधि सकिएर डम्पिङ साईटमा फाल्ने गरेको पाइएको छ । यसप्रति सरकारको ध्यान जान अति आवश्यक छ । म सभाध्यक्षमार्फत् सरकारको ध्यानाकर्षण गराउन चाहन्छु–त्यस्ता निःशुल्क पाईने औषधिहरुको सूचिसहितको नामाकरण जनताले थाहा पाउने गरी जानकारी गराईयोस् ।’
सांसद चपाईले दूर्गम क्षेत्रका जनताका लागि सडकलगायतका भौतिक पूर्वाधार निर्माणको काममा जोड दिन सरकार लाग्नुपर्नेमा पनि जोड दिनुभयो । उहाँले सडक लगायतका भौतिक पूर्वाधारको अभावमा दूर्गम क्षेत्रका बिरामीहरुले ज्यान गुमाउनुपर्ने अवस्था आएकोतर्फ पनि सरकारको ध्यानाकर्षण गराउनुभयो ।
