काठमाडौँ । स्याङ्जा जिल्लाको आँधिखोला गाउँपालिका वडा नं १ सिरुवारीमा मुख तथा दन्त स्वास्थ्य शिविर सम्पन्न भएको छ ।
कान्तिपुर डेन्टल कलेज शिक्षण अस्पताल बसुन्धरा काठमाडौँले विएम फाउण्डेशनको सहकार्यमा स्याङ्जाको आँधिखोला गाउँपालिका वडा नं १ सिरुवारी क्षेत्रका पाँच विद्यालयमा अध्ययनरत विद्यार्थी र ६०० भन्दा बढी घरमा मुख तथा दन्त स्वास्थ्य शिविर सम्पन्न गरेको हो ।
अस्पतालकी डाक्टर अस्मीता कार्कीले पछिल्लो समय अधिकाशं बालबालिकालाई मुख तथा दाँतको समस्या देखिएको बताउनुभयो । आफूले चेकजाँच गरेका कुल विद्यार्थीमध्ये ४० प्रतिशत विद्यार्थीमा मुख तथा दाँतको समस्या देखिने गरेको डा कार्कीको भनाई छ ।
सो अस्पतालले सिरुवारी क्षेत्रका पाँच विद्यालयमा अध्ययनरत झण्डै एक हजार विद्यार्थी र ६०० घरमा दन्त जनचेतना तथा उपचार गरेको थियो । उक्त अस्पतालले विद्यार्थीलाई दन्तरोगसम्बन्धी ब्रोसर, पम्पेल्टलगायतका सामाग्री समेत वितरण गरेको थियो ।
अस्पतालका कार्यकारी निर्देशक डा बुद्धिमान श्रेष्ठले नेपालको ग्रामीण क्षेत्रमा धेरै मुख तथा दाँतका विरामी रहेको उल्लेख गर्नुभयो । उहाँले स्थानीय तहले स्वास्थ्य क्षेत्रमा बजेट विनियोजन गर्दा मुख तथा दाँतको उपचारका लागि समेत वजेट विनियोजन गर्नुपर्ने आवश्यकता रहेको बताउनुभयो ।
कान्तिपुर डेन्टल अस्पतालले संस्थाको सामाजिक उत्तरदायित्व अन्तर्गत झण्डै दुई दशकदेखि स्याङ्जा जिल्लाका विभिन्न गाउँमा निःशुल्क मुख तथा दन्तशिविर सञ्चालन गर्दै आएको छ ।
