काठमाडौँ – नेपाल चेम्बर अफ कमर्सका पूर्व अध्यक्ष राजेन्द्र मल्लले मुलुकमा देखिएको ग्यास र अन्य अत्यावश्यक वस्तुको आपूर्ति व्यवस्थालाई सहज बनाउन सरकार र सरोकारवाला निकायले विशेष कदम चाल्नुपर्ने बताउनुभएको छ ।
नेपाल आर्थिक पत्रकार समाज (सेजन) द्वारा आयोजित ‘बाढी पहिरोपछिको आपूर्ति तथा मूल्य शृङ्खलामा परेको प्रभाव र देखिएका चुनौती’ विषयक छलफल कार्यक्रममा बोल्दै मल्लले ग्यास आपूर्तिको समस्या समाधानका लागि नेपाल आयल निगमले व्यावहारिक नियमन गर्नुपर्ने बताउनुभएको हो । उपभोक्तालाई ग्यासको सहज उपलब्धता गराउन एक उद्योगको खाली सिलिन्डर दिएर अर्को उद्योगको भरिएको सिलिन्डर लिन पाउने (क्रस–एक्सचेन्ज) व्यवस्था मिलाउन उहाँले सुझाव दिनुभयो । यसबाट उपभोक्ताले नयाँ सिलिन्डर किन्नुपर्ने अतिरिक्त आर्थिक भारबाट समेत मुक्ति पाउने उहाँले उल्लेख गर्नुभयो । सङ्कटका बेला बजारमा हुने कालोबजारी र अनुचित नाफाखोरीप्रति सङ्केत गर्दै उहाँले त्यस्ता गतिविधिमा संलग्नलाई कानुनसम्मत कारबाही गर्नुपर्ने बताउनु भयो । धमिलो पानीमा माछा मार्ने प्रवृत्तिलाई निरुत्साहित गर्न राज्य कडाइका साथ प्रस्तुत हुनुपर्नेमा उहाँले जोड दिनुभयो । पछिल्लो समय अविरल वर्षा र बाढी पहिरोका कारण तातोपानी र केरुङ नाकामा अवरोध सिर्जना भएको उल्लेख गर्दै मल्लले विकल्पका रूपमा ‘कोरोला नाका’ लाई तत्काल प्रयोगमा ल्याउनुपर्ने बताउनु भयो । चिनियाँ पक्षको सीमा अवरोधका कारण मारमा परेका व्यवसायीहरूका लागि कोरोला नाका उपयुक्त विकल्प हुनसक्ने उहाँको तर्क छ ।
उहाँले भन्नुभयो, ‘एउटा उद्योगको सिलिन्डर अर्कोसँग साटासाट गर्ने र पछि उद्योगहरूबिच नै हिसाब मिलान गर्ने संयन्त्र बनेमा बजारमा ग्यासको अभाव तुरुन्तै हट्छ । सडक मार्गभन्दा समुन्द्री मार्गबाट कन्टेनरमा सामान ल्याउँदा सस्तो पर्छ । यसतर्फ पनि ध्यान दिनु आवश्यक छ ।’
व्यवसायीहरूलाई व्यवस्थित ढङ्गले व्यापार गर्न आग्रह गर्दै मल्लले पोका–पुन्तरामा सामान ल्याउनुको साटो कन्टेनर प्रणाली अपनाउन सुझाव दिनुभयो । उहाँले अन्तर्राष्ट्रिय व्यापारमा बिमाको अनिवार्यताबारे समेत सचेत गराउनु भयो । बिमा नगरी ल्याइएका सामान बाटोमा क्षति हुँदा धेरै व्यवसायीहरू आर्थिक रूपमा धराशायी भएको बताउँदै उनले अन्तर्राष्ट्रिय व्यापारिक मापदण्ड र उत्तरदायित्व पालना गर्न आग्रह गर्नुभयो । भन्सार प्रक्रिया पूरा भए पनि बिमा अभावमा क्षतिपूर्ति नपाउँदा व्यवसायीहरूले ठुलो नोक्सानी व्यहोर्नु परेको उहाँले जानकारी दिनुभयो ।–न्युज एजेन्सी नेपाल
