४ जेठ, काठमाडौं । नेपालको शेयर बजारमा मंगलबार (आज) कारोबार रकमसँगै परिसूचकले पनि रेकर्ड तोडेको छ । आज नेपाल स्टक एक्सचेञ्ज (नेप्से) परिसूचक हालसम्मकै उच्च विन्दुमा पुगेर बन्द भएको छ भने कारोबार रकमले पनि नयाँ रेकर्ड कायम गरेको छ । आज २८०० विन्दु नजिक पुगेर बजार बन्द भएको छ ।
नेप्से परिसूचक ३४.६८ अंकले वृद्धि भएर २७९३.८९ विन्दुमा बन्द भएको हो । त्यस्तै कारोबार रकम पनि हालसम्मकै उच्च भएको छ । गत आइतबरा १० अर्ब ४० अर्बको सबैभन्दा बढी कारोबार भएको दिनको रेकर्ड बनाएको बजारले आज ११ अर्ब ३५ करोड ९३ लाख रुपैयाँभन्दा बढीको शेयर कारोबार भएर नयाँ रेकर्ड बनाएको छ ।
यस अघि जेठ २ गते आइतबार १० अर्ब ४० करोड रुपैयाँको शेयर कारोबार भएको थियो भने माघ २६ गते पनि १० अर्ब १७ करोड र फागुन ४ गते १० अर्ब ३ करोड रुपैयाँ बराबरको शेयर कारोबार भएको थियो ।