१८ जेठ, काठमाडौं । कलाकार मदनकृष्ण श्रेष्ठले सरकारलाई भ्याक्सिन बटुलेर जनतालाई बचाउन आग्रह गर्नुभएको छ। एक साताअघि अस्पतालबाट कोरोना जितेर घरफर्किनु भएको श्रेष्ठले मंगलबार सामाजिक सञ्जालमा एक पोष्ट गर्दै उहाँले सरकारलाई यस्तो आग्रह गर्नुभएको हो।
उहाँले लेख्नुभएको छ,‘सरकारले कोरोनालाई नै पहिलो प्राथमिकता दिएर, सबै तिरबाट जति सकिन्छ छिटो भ्याक्सिन बटुलेर जनतालाई भ्याक्सिन दिएर जनताको ज्यान बचाउन तिर लाग्न सम्झाउन चाहन्छु’, त्यस्तै उहाँले अगाडी लेख्नुभएको छ, ‘कोरोनाले मलाई पछार्न त नराम्रैसँंगै पछार्यो । पछार्यो मात्र हैन अझ लछार्यो र हस्पिटलमा लगेर मलाई बेस्कन बजार्यो, ओर्कायो, फर्कायो, थर्काउनु थर्कायो बेलाबेलामा तर्सायो पनि । बलियो चाहिँ निक्कै बलियो रहेछ बजिया … । तर सबैको माया, शुभेक्षा, प्रार्थना, र आशिर्वादको बलले गर्दा मलाई त्यसले जित्न भने सकेन ।’ साथै उहाँले सरकारलाई प्रश्न समेत गर्नुभएको छ ‘जनता नै भएन भने कसलाई शासन गर्ने ?’
