काठमाडौं , २२ जेठ
प्रधानमन्त्री केपी ओलीले आज विस्तार गरेको मन्त्रीमण्डल संविधान विपरीत भएको विपक्षी दलहरुले बताएका छन् । उनीहरुले काम चलाउ हैसियतको सरकारले मन्त्रीमण्डल विस्तार गर्नु हास्यास्पद भएको पनि बताएका छन् ।
विपक्षी दल नेपाली काँग्रेसका नेता डा मिनेन्द्र रिजालले यो सरकारको वैधानिकता सर्वोच्च अदालतमा परीक्षणका क्रममा रहेको र सरकार आफै काम चलाउ मात्र हैसियतमा रहेकाले आफुलाई विस्तार गर्ने कुरा हास्यास्पद बाहेक अरु केही होइन भनेका छन् ।
उनले यो सरकार बनेपछि नै संविधान विपरीत काम गर्दै आएको र अहिलेको मन्त्रिमण्डल पुनर्गठनको प्रयास पनि त्यसैको निरन्तरता भएको बताएका हुन् । उनले प्रधानमन्त्री ओलीले आफ्नो अहंकारमा संविधान र लोकतन्त्र नै सिध्याउने प्रयास गरेको आरोप पनि लगाए ।
माओवादी नेता देव गुरुङले यो संविधानले यो सरकारलाई नचिन्ने बताएका छन् । उनले यो काम चलाउ सरकार सँग मन्त्रिमण्डल विस्तारको हैसियत नै नहुने बताए । आफैंले चुनाव घोषणा गरेर काम चलाउ भैसकेको सरकारले मन्त्रि थप्नु व्यवहारिक र अरु सबै दृष्टिकोणले असंवैधानिक भएको उनको दाबी छ ।