मानौं जीवनको याम फेरिन्छन् ऋतुका सरी (अनुष्टुप छन्द)
१
काँप्तछन् थर्थरी कोही,झार्दछन् पसिना कतै
नवीन वस्त्रमा कोही, नाङ्गै छ जीवनी कतै ,
उड्छन् चरी सरी हुर्र,बग्छन् आनन्द निर्झरी
मानौं,जीवनका याम फेरिन्छन् ऋतुका सरी।
२
थप्छन् मानिसले न्यानो कम्बल शीतकालमा
निर्लिप्त मोहमा कोही, कोही व्याप्त उदासमा,
रामकृष्ण कतै जप्छन्,कतै उन्माद बेस्सरी
मानौं,जीवनका याम फेरिन्छन् ऋतुका सरी।
३
फाल्छन् राग कडा दम्भ साँझमा घोर मेघ झैं
छड्के हेर्छन् बनी टिल्ल नर राक्षस नै अझै,
भोलिपल्ट सबै झल्ल मोहनीमय निर्झरी
मानौं,जीवनका याम फेरिन्छन् ऋतुका सरी।
४
दुष्टता, शिष्टता सारा सभ्यता,सान,सौरभ
चेत,चरित्र औ दृष्टि फेरिन्छन् युग गौरव,
बाल्य,यौवन औ बृद्ध अबस्था सपना सरी
मानौं,जीवनका याम फेरिन्छन् ऋतुका सरी।
राजेन्द्र श्रेष्ठ, न्यूयोर्क ।
प्रतिक्रिया
