काठमाडौँ । मुलुकको विकासका लागि सीपमुलक शिक्षा आवश्यक रहेको बताइएको छ ।
नवोदित विद्या कुञ्ज उच्च माध्यामिक विद्यालयको ३१ औँ अभिभावक दिवसका अवसरमा बौल्दै पूर्वराजदूत एवम् कुटनीतिज्ञ प्राडा जयराज आचार्यले मुलुकको विकासका लागि व्यवसायिक र सीपमुलक शिक्षा आवश्यक रहेको बताउनुभएको हो ।
“मुलुकमा योग्य नागरिक निर्माण गर्न सीपमुलक शिक्षा आवश्यक छ, यसलाई नवोदित स्कुलले पुरा गर्नुपर्छ,”– प्राडा आचार्यले भन्नुभयो । उहाँले विज्ञान, गणित र अङ्ग्रेजी विषयलाई विद्यालयले विशेष प्राथमिकता दिनुपर्ने बताउनुभयो ।
काठमाडौँ महानगरपालिका वडा नं २६ का वडा अध्यक्ष ख्यामराज तिवारीले नेपाल हरेक वस्तुले धनी मुलुक भएको भन्दै त्यसलाई सही रुपमा उपयोग गर्नका लागि व्यावहारिक शिक्षालाई प्राथमिकता दिनुपर्ने बताउनुभयो । गुणस्तरीय शिक्षाको लागि काठमाडौँ महानगरपालिका सहयोग गर्ने उहाँको भनाई थियो ।
विद्यालयका प्राचार्य राजेन्द्र अधिकारीले सामाखुसी क्षेत्रको शैक्षिक विकासका लागि नवोदित स्कूलले विगत तीन दशकदेखि महत्वपूर्ण भूमिका खेल्दै आएको भन्दै आगामी दिनमा यसलाई निरन्तरता दिने बताउनुभयो ।
कार्यक्रममा वरिष्ठ कलाकार पशुपति शर्माले सांस्कृतिक प्रस्तुती दिनुभएको थियो । कार्यक्रममा उत्कृष्ट विद्यार्थी तथा अभिभावकलाई सम्मान गरिएको थियो ।
