काठमाडौं । नेत्र विक्रम चन्द ‘विप्लव’ अन्त्यतः संसदीय राजनीतिमै फर्किएका छन् । यसअघि संसदीय चुनावको विरोध गर्दै आएको विपल्व नेतृत्वको नेपाल कम्युनिष्ट पार्टीले २०८४ सालमा चुनाव लड्ने घोषणा गरेको हो ।
पार्टीको वैशाख ५–९ गतेसम्म कपिलवस्तुमा बसेको केन्द्रीय कमिटी बैठकले आगामी निर्वाचनमा उम्मेदवारी दिने निर्णय गरेको पार्टीका महासचिव नेत्र विक्रम चन्द ‘विप्लव’ले जानकारी दिए । बैठकको निर्णय सुनाउदै उनले भने- ‘चुनावलाई २०औं शताब्दीको संसदीय कोणबाट मात्रै हेर्नुहुँदैन । २१औं शताब्दीको विशेषता, अहिलेका विभिन्न खालका प्रवृत्तिहरू नयाँ वर्ग, विकास भएको प्रविधि ज्ञान, चरित्रबाट नापेर चुनावलाई समाजवाद प्राप्तको एउटा अभियानमा बदल्न सकिन्छ । बदल्ने गरी सोच्नुपर्छ ।
उनले संघर्षको नयाँ मोर्चाको रूपमा देशलाई समाजवादमा लैजाने गरी चुनावको प्रयोग गर्नुपर्छ भन्ने बैठकको निष्कर्ष रहेको बताए । विप्लव नेतृत्वको पार्टीले यसअघि संसदीय चुनावको विरोध गर्दै आएको थियो ।
