काठमाडौं – पाकिस्तानको काराकोरम हिमशृङ्खलामा रहेको ८,०४७ मिटर अग्लो ब्रोड पीक हिमाल आरोहणका क्रममा गएको हिमपहिरोमा परी बेपत्ता भएका नेपाली तथा विदेशी पर्वतारोहीहरूको शीघ्र खोज तथा उद्धारका लागि नेपाल सरकारले पाकिस्तानसँग समन्वय गरिरहेको जनाएको छ।
संस्कृति, पर्यटन तथा नागरिक उड्डयन मन्त्रालयअन्तर्गतको पर्यटन विभागले शुक्रबार प्रेस विज्ञप्ति जारी गर्दै साउन १४ गते (जुलाई ३०, २०२६) भएको हिमपहिरोमा विश्वविख्यात नेपाली आरोहीसहित विभिन्न देशका पर्वतारोही बेपत्ता भएको घटनाप्रति गहिरो दुःख व्यक्त गरेको हो।
विभागले बेपत्ता आरोहीहरूको खोज तथा उद्धारलाई प्रभावकारी बनाउन सम्बन्धित सबै सरोकारवाला निकायलाई आवश्यक पहल र समन्वय गर्न अनुरोध गरेको छ। साथै, बेपत्ता नेपाली आरोहीहरूको उद्धारका लागि पाकिस्तानस्थित नेपाली दूतावासमार्फत पाकिस्तान सरकारसँग निरन्तर समन्वय भइरहेको पनि विभागले जनाएको छ।
पर्यटन विभागका अनुसार बेपत्ता हुने नेपाली आरोहीहरूमा पुरबहादुर गुरुङ ‘युक्ता’, किली पेम्बा शेर्पा ‘किलु’, निमा शेर्पा, नवाङ थिन्डु शेर्पा, ग्यालु शेर्पा तथा विश्वप्रसिद्ध पर्वतारोही निर्मल पुर्जा ‘निम्स दाइ’ रहेका छन्।
विभागले बेपत्ता आरोहीहरूको सुरक्षित उद्धारका लागि सबै पक्षबाट आवश्यक सहयोग र समन्वय जारी रहने जनाएको छ।
