काठमाडाैँ – विराटनगरको प्रतिष्ठित औद्योगिक घराना देवनरा मुन्दडा समूहको घरमा प्रहरीले सोमबार बिहानैदेखि घेराउ गरेर खोजतलास थालेको छ ।
बिहान करिब ४ बजेदेखि प्रहरीले मुन्दडा समूहको घरलाई नियन्त्रणमा लिएर खोजतलास गरिरहेको भए पनि कारबाहीको कारणबारे भने हालसम्म कुनै आधिकारिक जानकारी सार्वजनिक गरेको छैन ।
प्रहरीले खोजतलास गरिरहेको क्षेत्र आसपासको सुरक्षा व्यवस्था पनि कडा बनाएको छ । गोल्छा मोडदेखि जिल्ला प्रहरी कार्यालयसम्म पर्ने पण्डित मेघराज शर्मा मार्गमा प्रहरीले आवतजावतमा रोक लगाएको छ । उक्त क्षेत्रमा सर्वसाधारणलाई प्रवेश गर्न दिइएको छैन ।
मुन्दडा समूह जेजे ज्वेलर्स नामको चाँदीका गहना उद्योग, बाबा आयल रिफाइनरी, हाइलाइफ चप्पल लगायतका उद्योग सञ्चालन गर्दै आएको समूह हो । नेपालको सबैभन्दा ठूलो चाँदी उद्योगको रूपमा समेत जेजे ज्वेलर्स चर्चित छ ।
सोही समूहका प्रकाश मुन्दडा नेपाल उद्योग परिसंघ (सीएनआई) कोशीका वरिष्ठ उपाध्यक्ष तथा मोरङ उद्योग व्यापार संघका पूर्वअध्यक्षसमेत हुन् ।
प्रहरीले गरेको खोजतलास कुन विषयसँग सम्बन्धित छ भन्नेबारे भने अहिलेसम्म केही खुलाइएको छैन । खोजतलासको कारण, अनुसन्धानको प्रकृति वा सम्भावित मुद्दाबारे प्रहरीको आधिकारिक धारणा सार्वजनिक हुन बाँकी छ ।
