काठमाडौँ – नेकपा एमाले संसदीय दलका नेता रामबहादुर थापाले मुलुकमा वर्षेनी हुने बाढीपहिरोको विनाश रोक्न र प्रभावकारी विपद् व्यवस्थापनका लागि सरकारको ध्यानाकर्षण गराउनुभएको छ ।
प्रतिनिधि सभाको बुधबारको बैठकमा बोल्दै नेता थापाले हरेक वर्ष प्राकृतिक विपत्तिमा ज्यान गुमाउनेहरूप्रति श्रद्धाञ्जली अर्पण गर्ने परम्परा मात्र निभाउनुभन्दा यो नियति बदल्न दृढ सङ्कल्पका साथ अघि बढ्नुपर्नेमा जोड दिनुभयो । नेता थापाले राज्यको प्रमुख नेतृत्वका रूपमा प्रधानमन्त्री बालेन्द्र साहले आफ्नो एकाङ्की शासन शैलीमा गुणात्मक परिवर्तन गर्नुपर्ने बताउनु भयो । सरकार संसदप्रति पूर्णतः उत्तरदायी हुनुपर्ने र आफ्ना योजनाहरूबारे संसदलाई निरन्तर जानकारी गराउनुपर्ने उहाँको भनाइ छ । विद्यमान सङ्कटको सामना राष्ट्रिय सहमतिबाट मात्र सम्भव हुने उल्लेख गर्दै उहाँले राजनीतिक दल, नागरिक समाज र विज्ञहरू सम्मिलित बहुपक्षीय संयन्त्र निर्माण गर्न सरकारलाई सुझाव दिनुभयो । सामूहिक र सङ्गठित प्रयासले मात्रै विपद्को जोखिम न्युनिकरण र व्यवस्थापन गर्न सकिने उहाँले स्पष्ट पार्नुभयो ।
नेता थापाले सरकारको कामकारबाहीमा सहजीकरण र निगरानी गर्न सभामुखमार्फत विशेष संसदीय समिति गठनको प्रस्ताव समेत अघि सार्नुभयो । विपद् व्यवस्थापनका लागि उहाँले विभिन्न मन्त्रालयको नेतृत्वमा विशेष कार्यदलहरू गठन गर्नुपर्ने आवश्यकता औँल्याउनुभयो । जसमा अन्तर्राष्ट्रिय सहयोग, क्षतिपूर्ति र समन्वयका लागि परराष्ट्रमन्त्रीको नेतृत्वमा, युद्धस्तरमा उद्धार तथा राहत कार्यका लागि रक्षामन्त्रीको नेतृत्वमा र पुनर्निर्माणका कार्यका लागि अर्थमन्त्रीको नेतृत्वमा विशेष कार्यदल (टास्क फोर्स) बनाउनुपर्ने उहाँको माग छ ।
यसैगरी, जलवायु परिवर्तनबाट सिर्जित सङ्कटको सामना गर्न अन्तर्राष्ट्रिय ऐक्यवद्धता जुटाउन र आवश्यक रणनीति तय गर्न सरकारले ‘सगरमाथा संवाद’ को दोस्रो संस्करणलाई तत्काल अगाडि बढाउनुपर्नेमा उहाँले जोड दिनुभयो । प्राकृतिक विपत्तिलाई नियति मानेर बस्ने प्रवृत्तिलाई बदल्न सरकारले विशेष योजना र तत्परता देखाउनुपर्ने नेता थापाको भनाइ छ । –न्युज एजेन्सी नेपाल
