बिश्वव्यापी संक्रमणको रुपमा फैलिएको कोरोना भाइरस तथा कोभिड १९ संक्रमणको जोखिम बढेसँगै रसुवाको गोसाइँकुण्ड गाउँपालिका ५ स्याफ्रुबेशीमा रहेका खाद्यान्न तथा अत्यावश्यकीय पसलमा दुरी कायम गरिएको छ ।
सरकारले मंगलवारदेखि लागु गरेको लकडाउनको प्रभावले दैनिक उपभोग्य पसलमा भीडभाड हुन थालेपछि गोसाइँकुण्ड गाउँपालिकाको स्वास्थ्य शाखा र प्रहरीको नेतृत्वमा ग्राहकको लाइन बस्ने स्थानमा रेखांकन गरि गोलो घेरा लगाइएको हो ।
बजारका पसलमा उपभोग्य समान किन्नेहरुको भिडभाड हुन थाले पछि रेखांकन गरि गोलो घेरा लगाईएको गोसाइँकुण्ड गाउँपालिकाका स्वास्थ्य शाखा प्रमुख बिमल घिमिरेले बताए ।
रेखांकन पछि पसलमा पनि भिड नहुने र कोरोनाको जोखिम रोकथाममा सहयोग पुग्ने उनले बताए । उपभोक्ता र बिक्रेता बिचको दुरी २ मिटरको गोलाकार कायम गरि रेखांकन गरिएको उनले बताए ।
जिल्लाका अन्य बजारहरुमा पनि रेखांकन गरि गोलो घेरा लगाइए भिडभाड कम हुने र कोरोना भाइरसको जोखिम कम गर्न सहयोग पुग्ने समेत घिमिरेले बताएका छन् ।
दैनिक उपभोग्य पसलहरुलाई नेपाल सरकारले अत्यावश्यकमा राखेको छ । जसका कारण अरु व्यापार, व्यवसाय बन्द गरिए पनि बिहान ७ बजेदेखि ९ बजेसम्म र साँझ ४ बजेदेखि ६ बजेसम्म दैनिक उपभोग्य सामानका पसल भने सञ्चालनमा रहेका छन् ।
