रसुवामा अत्यावश्यक सामाग्री बोकेर जिल्ला भित्र भित्रिने सवारी साधनले अनिवार्य रुपमा बिलबिजक बोक्नुपर्ने भएको छ । बिहिबार जिल्ला प्रशासन कार्यालय रसुवामा बसेको कोभिड १९ जिल्ला कमाण्ड पोष्टको बैठकले जिल्ला बाहिरबाट ढुवानी हुने सवारी साधनले अत्यावश्यक मालबस्तुको बिलबिजक अनिवार्य रुपमा बोक्नुपर्ने निर्णय गरेको हो ।
अन्य आवश्यक कागजात वा सम्बन्धित व्यवसायी र फर्मले जारी गरेको मिति स्थान खुलेको सिफारिस र अनुरोध पत्रका आधारमा ढुवानी भएका सवारी साधनलाई जिल्लामा प्रवेश गराइने प्रमुख जिल्ला अधिकारी अर्जुन भण्डारीले बताए ।
जिल्ला प्रवेश गरेका सवारी साधनलाई बेत्रावती स्थित सुरक्षा पोष्टबाट ढुवानी कार्ड जारी गरी अभिलेख राखिने भएको छ । त्यसका लागि चालक र एकजना सहयोगिले मात्र यात्रा गर्न पाउने भएका छन् । उनीहरुले अनिवार्य रुपमा मास्क, पन्जा र ह्याण्ड स्यानेटाइजर को प्रयोग गर्नुपर्ने निर्णय भएको छ ।
त्यसैगरि, अत्यावश्यक बस्तु (खाद्यान्न, औषधी, इन्धन, कुखुरा, कुखुराको चल्ला, दाना, फलफूल, तरकारी, दुध आदी) बोकेका सवारी साधनले सम्बन्धित वडा कार्यालय वा व्यवसायी र फर्मले जारी गरेको लिखित सिफारिस र अनुरोध सुरक्षा पोष्टले दिनुपर्ने र पोष्टले यकिन गर्ने निर्णय भएको छ ।
यदि उचित देखिएमा सुरक्षा पोष्टले ढुवानी कार्ड जारी गर्ने भएको छ । हरेक सुरक्षा पोष्टले जारी गरेको ढुवानी कार्डमा समय खुलाई दरपीठ गर्नुपर्ने बताइएको छ ।