काठमाडौं । अमेरिकाले कोरोना भाइरसको संक्रमण फैलाएर खर्बौं अमेरिकी डलरको आर्थिक क्षति पुर्याएको भन्दै चीनविरूद्ध मुद्दा दर्ता गरेका छन्। मंगलबार अमेरिकाको मिजौरी राज्यका महान्याधिवक्ताले चीनविरूद्ध मुद्दा दर्ता गरेका हुन्।
पूर्वीमिजौरीको जिल्ला अदालतमा दायर गरिएको मुद्धामा महान्याधिवक्ता एरिक स्मिटले चिनियाँ अधिकारीहरूले भाइरस मानिसबाट सर्ने जानकारी लुकाएको, संक्रमणको चेतावनी दिनेलाई चुप लगाएको, प्रकोप नरोकी विश्वभर फैलिन दिएको आरोप लगाएका छन्। मुद्धामा चीन सरकारले सुरूमा कोरोनाभाइरस ढाकछेप गरेकाले संसारभर महामारी फैलिएको आरोप लगाइएको छ।
महान्याधिवक्ता स्मिटले मुद्धाबाट आफूले ठूलो मात्रामा भएको जनधनको क्षति र त्यसबाट मानिसले पाएको दुःख र मिजौरीका जनताले भोग्नु परेको आर्थिक अशान्तिको न्याय खोजेको बताएका छन्।
‘चिनियाँ अधिकारीबाट भएको छल, ढाकछेप, असक्रियता एवम् कोरोनासम्बन्धी सूचना लुकाउने कुकर्मले महामारी ल्याएको’ उजुरीमा उल्लेख छ।
उजुरीमा चीनसँग माग्नु पर्ने क्षतिको रकम भने उल्लेख गरिएको छैन्।
चिनियाँ स्वास्थ्य अधिकारीले डिसेम्बरको अन्त्यमा नै कोरोना भाइरस मानिसबाट मानिसमा सर्ने प्रमाण पाएको भए पनि जनवरी २० सम्म त्यसलाई लुकाएको उनको आरोप छ।
कोभिड-१९ नाम दिइएको कोरोना भाइरसबाट हालसम्म संसारमा २५ लाख बढी मानिसहरू संक्रमित भइसकेका छन् भने १ लाख ७४ हजार मानिसहरूको ज्यान गइसकेको छ।
