वासिङ्टनः अमेरिकी राष्ट्रपति डोनाल्ड ट्रम्पले काेराेनाभाइरस प्रसार राेकथाममा पर्याप्त काम गर्न नसकेकाे तथा चीनकाे पक्ष लिएकाे भन्दै विश्व स्वास्थ्य संगठन (डब्ल्यूएचओ)सँग अमेरिकाले सबै सम्बन्ध तोडेको घोषणा गरेका छन् ।
ट्रम्पले यसअघि नै अमेरिकाले दिँदै आएको आर्थिक सहयोग बन्द गराएका थिए । अमेरिकाले हरेक वर्ष डब्ल्यूएचओलाई ४५ करोड डलर आर्थिक सहयोग दिन्छ । अमेरिका डब्ल्यूएचओको सबैभन्दा ठूलो दाता हो ।
शुक्रबार ह्वाइटहाउसमा आयोजित पत्रकार सम्मेलनमा ट्रम्पले भने, ‘हामीले डब्ल्यूएचओलाई ब्यापक सुधार गर्न अनुरोध गरेका थियौं तर ऊ असफल भयो । आजबाट हामीले विश्व स्वास्थ्य संगठनसँगको नाता तोड्दैछौं ।’
डब्ल्यूएचओलाई दिँदै आएको आर्थिक सहयोग अब सार्वजनिक स्वास्थ्यका कार्यक्रममा अमेरिका स्वयंले खर्च गरिने ट्रम्पकाे भनाइ छ ।
चीनबाट सुरु भएको कोरोना भाइरस संक्रमण विश्वभर फैलिनु र जनधनको ठूलो क्षति हुनुमा डब्ल्यूएचओ नै जिम्मेवार रहेको आरोप ट्रम्पको छ ।
चीनप्रति लचिलाे भएकाे भन्दै ट्रम्पले भने, ‘डब्ल्यूएचओ पूर्णरुपमा चीनको नियन्त्रणमा छ । जबकि अमेरिकाले भन्दा चीनले थोरै मात्र आर्थिक सहयोग दिन्छ । चीनले केबल चार करोड डलर दिन्छ तर डब्ल्यूएचओमा उसैको नियन्त्रण छ ।’
अमेरिकाले डब्ल्यूएचओमा केके सुधार गर्ने भनेर विस्तृत रुपमा भनेको तर डब्ल्यूएचओले नमानेको आरोप ट्रम्पले लगाए ।
अमेरिकाले कोरोना भाइरस फैलिनुको कारण पत्ता लगाउन डब्ल्यूएचओले विशेषज्ञहरुको टोली चीनमा पठाउनुपर्ने माग राख्दै आएको छ । २०१९ को डिसेम्बर अन्तिम साता चीनबाट कोरोना भाइरस संक्रमण फैलिएको थियो । तर अमेरिकाले चीनको उहानस्थित इन्स्टिच्यूट अफ भाइराेलाेजी ल्याबबाट काेराेना भाइरस फैलिएको आशंका गर्दै आएको छ ।
कोरोना भाइरसलाई चीनले पूर्ण नियन्त्रणमा लिइसकेको छ । तर अमेरिका अहिले कोरोनाबाट विश्वमै बढी प्रभावित देश बनेको छ । अमेरिकामा कोरोना संक्रमणका कारण एक लाख १ हजार ४ सय ५४२ जनाको मृत्यु भइसकेकाे छ ।
