रसुवा, ३१ भदौ। कुलमान घिसिङलाई नेपाल विद्युत प्राधिकरणको कार्यकारी निर्देशकमा फेरि नियुक्त गर्न माग गर्दै रसुवामा प्रदर्शन भएको छ । जिल्लाको सदरमुकाम धुन्चे सहित बेत्रावती, कालिकास्थान, स्याफ्रुबेशी लगायतको क्षेत्रमा प्रदर्शन भएको हो । स्वतन्त्र नागरिक समूहले शान्तिपुर्ण रुपमा प्रदर्शन गरेका हुन् ।
विभिन्न प्ले कार्ड बोकी सरकारले कुलमानमाथि न्याय गर्न नसकेको भन्दै नाराबाजी गरेका थिए । राष्ट्रिय झण्डासहित उपस्थित युवाहरुको समूहले कुलमानको पुनः नियुक्तिमा ढिलाइ भएको भन्दै सरकारविरुद्ध नाराबाजी गरेका हुन् । उनीहरुले कुलमानलाई फेरि प्राधिकरणमा जिम्मेवारी दिने गरी निर्णय गर्न सरकारको ध्यानाकर्षण गराएका छन् ।
घिसिङ बुधबार प्राधिकरणबाट बिदाइ भएका थिए । नेपालमा लोडसेडिङ घिसिङकै नेतृत्वमा हटाइएको भन्दै उनलाई नै प्राधिकरणमा निरन्तरता दिन समर्थकहरूको माग छ । तर ऊर्जा मन्त्रालयले भने गत सोमबारको मन्त्रिपरिषद बैठकमा प्राधिकरणका कार्यकारी निर्देशक नियुक्तिबारे प्रस्ताव नै लगेको थिएन् ।