१६ फागुन, काठमाडौं । नेपाली काँग्रेसका नेता तथा पूर्वमन्त्री नवीन्द्रराज जोशीको स्वास्थ्य अवस्थामा क्रमिक सुधार हुन थालेको छ । शुक्रबार बिहान मष्तिष्कघात भई नर्भिक अस्पतालमा भर्ना गरिएका नेता थापाथलीस्थित नर्भिक इन्टरनेशनल अस्पतालमा भेन्टिलेटरमा राखेर उपचार भैरहेको छ ।
शनिबारको तुलनामा आइतबार जोशीको स्वास्थ्य अवस्थामा निकै सुधार देखिएको उपचारमा संलग्न न्यूरो सर्जन डा.राजीव झाले जानकारी दिनुभयो । उहाँका अनुसार जोशीले दाहिने हात र खुट्टा अघिल्ला दिनको तुलनामा आइतबार बढि चलाएको र भने आइतबार बिहानदेखि नै बेहोस पार्ने औषधि दिन छाडिएको छ । तर, पनि जोशीका आँखा भने अझै खुलेका छैनन् ।
यस्तै, आइतबार जोशीको सिटी स्क्यान गरिएको अस्पतालले जनाएको छ । जसअनुसार उहाँको टाउकोमा जमेको रगत र रक्त मिश्रित पानी समेत लगभग सफा भएको अस्पतालले बताएको छ । ‘उहाँको अवस्था अझै खतरामुक्त भने छैन’ डा.झाले भन्नुभयो, ‘उहाँको अहिलेको अवस्था जटिल, तर सुधारोन्मुख भन्नुपर्छ ।’
