काठमाडौँ, २२ जेठ । गत वर्ष अपहरणमा परेको भनिएका मधेसी सांसद नै कामचलाउ सरकारका मन्त्री बनेका छन् ।
विस २०७७ वैशाख १० गते नेपाल कम्युनिष्ट पार्टी (एमाले)का सांसदद्धय महेश बस्नेत र किसान श्रेष्ठ तथा पूर्व प्रहरी महानिरीक्षक सर्वेन्द्र खनालले अपहरण गरेका भनिएका सांसद नै मन्त्री बनेका हुन् ।
तत्कालिन समयमा समाजवादी पार्टीका सांसदद्धय डा सुरेन्द्र यादव र उमाशंकर अरगरिया अपहरणमा परेको नाटक गरेका थिए । सोही घटनासँगै एक भएका मधेसी दल अहिले विभाजित भएर फेरी दुई कित्तामा पुगेका छन् ।
शुक्रबार पार्टीका नेता राजेन्द्र महतोको नेतृत्वमा ८ मन्त्री र २ राज्यमन्त्री लिएर जसपा नेताहरु सरकारमा गएसँगै मधेसवादी दल स्पष्ट दुई कित्तामा बाँडिएको छ । आफ्नो व्यक्तिगत काममा तराई गएका सांसदद्धय र पूर्व आईजीपीसँग लिफ्ट मागेर काठमाडौँ फर्केका सांसदद्धयले काठमाडौँ आएसँगै आफू अपहरणमा परेको बताएका थिए ।
सत्ता र स्वार्थका लागि माहिर मधेसी नेता अपहरणमा परेको नाटक गरेको १३ महिनापछि कामचलाउ सरकारमा सहभागी भएका छन् ।