काभ्रेपलाञ्चोक, ५ साउन । विकल्पका लागि आवाज नेपालले काभ्रेपलाञ्चोकको पाँचखालस्थित राधाकृष्ण प्राथमिक विद्यालयका ८५ विद्यार्थीलाई पुस्तक वितरण गरेको छ ।
नेपाली काँग्रेसका युवा नेता एवम् महाधिवेशन प्रतिनिधी लिलाबल्लभ दाहाल ‘काका’को विशेष सहयोगमा विकल्पका लागि आवाज नेपालले आज काभ्रेपलाञ्चोक पाँचखाल नगरपालिका–१० स्थित राधाकृष्ण प्राविमा अध्ययनरत ८५ विद्यार्थीलाई पुस्तक सहयोग गरेको हो ।
कार्यक्रममा नेता दाहालले मुलुकको पहिलो प्राथमिकता शिक्षा हुनुपर्ने बताउँदै गुणस्तरीय शिक्षाका लागि विद्यालयले महत्वपूर्ण भूमिका खेल्नुपर्ने बताउनुभयो । “सरकारले शिक्षाभन्दा अरु क्षेत्रमा बढी वजेट विनियोजन ग¥यो, वर्तमान सरकारले शिक्षा क्षेत्रलाई विशेष प्राथमिकता दिनुपर्छ,”– उहाँले भन्नुभयो ।
नेपाली काँग्रेस काभ्रेका नेता सुन्दरमणि आचार्यले मुलुकको विकासका लागि राज्यले शिक्षा क्षेत्रमा यथेष्ट लगानी गर्नुपर्ने बताउनुभयो । विद्यालयमा दरबन्दी थप्ने कुरामा आफूले विशेष पहल गर्ने उहाँको भनाई थियो । काँग्रेस काभ्रेका अर्का नेता निराजन लुईँटेलले स्थानीय सरकार र प्रदेश सरकारले शिक्षा क्षेत्रको विकासका लागि विशेष पहल गर्न आग्रह गर्नुभयो ।
विस २०६५ सालमा स्थापना भएको उक्त विद्यालयमा स्थायी दरबन्दी नहुँदा समस्या भएको विद्यालयका प्रधानाध्यापक गीता लुईँटेलले जानकारी दिनुभयो । स्थापना भएको १३ वर्षसम्ममा पनि उक्त विद्यालयमा दुई जना राहत शिक्षक र पाँचजना निजी शिक्षकबाट अध्यापन हुँदै आएको छ ।
स्रोत अभावका कारण निजी शिक्षकलाई मासिक ६ हजार तलब दिँदै आएको उक्त विद्यालयलाई गत वर्षदेखि वडा कार्यालयले रु दुई लाख वजेट विनियोजन गरेको विद्यालय व्यवस्थापन समितिका अध्यक्ष सूर्यप्रसाद तिमल्सेनाले बताउनुभयो ।
विस २०७४ सालमा स्थापना भएको विकल्पका लागि आवाज नेपालले यसभन्दा पहिले ओखलढुङ्गाको नारेस्थान सामुदायिक पुस्तकालय र माम्खा सामुदायिक पुस्तकालय निर्माण गरेर शिक्षा क्षेत्रको विकासमा सहयोग गर्दै आएको उक्त संस्थाका अध्यक्ष युवराज तिमल्सेनाले जानकारी दिनुभयो । यस्तै उक्त संस्थाले बाढीपहिरो पीडित र हावाहुरी पीडितलाई समेत सहयोग गरेको छ ।
विकल्पका लागि आवाज नेपालका महासचिव मदन ढुङ्गानाले आफ्नो संस्थाले आगामी दिनमा पनि यस्ता कार्यलाई निरन्तरता दिने वचनवद्धता व्यक्त गर्नुभयो । यस्तै, उक्त संस्थाले आजै पाँचखाल नगरपालिका–२ स्थित ज्ञानोदय निमाविमा समेत स्टेशनरी सामाग्री सहयोग गरेको छ ।