१० साउन, झापा । झापाका दमक र शिवसताक्षी नगरपालिकामा सोमबार (भोलि)देखि पूर्ण ‘लकडाउन’ गरिने भएको छ ।
प्रदेश नम्बर–१ का कतिपय स्थानीय तहले कोरोना संक्रमणको घट्दो दरलाई हेरेर लकडाउन खुकुलो गरिरहेका छन् । तर, दमकमा अरु स्थानीय तहको तुलनामा संक्रमित बढ्न थालेपछि पूर्ण लकडाउनमा जाने निर्णय गरिएको नगरपालिकाका मेयर रोमनाथ ओलीले बताउनुभयो ।
ओलीको अध्यक्षतामा बसेको नगरस्तरीय कोभिड रोकथाम तथा नियन्त्रण समन्वय समिति बैठकले आउने एक सातासम्म पूर्ण लकडाउन गर्ने निर्णय गरेको हो ।
लकडाउन अवधिभर घरबाहिर निस्कन नपाइने, व्यापार–व्यवसाय बन्द गर्नुपर्ने, अस्पताल र औषधि पसल मात्र खोल्न मिल्ने विषयमा नगरपालिकाले नगरवासीलाई सूचित गरेको छ । स्वास्थ्य शाखाका अनुसार हाल नगरभरि ५०१ जना सक्रिय संक्रमित छन् ।
दमकमा शनिबार ३८ जना नयाँ संक्रमित थपिएका थिए । दोस्रो लहरमा ३८ जना मृत्यु भइसकेको छ । दुई हजार ८२१ जना संक्रमित हुँदा उपचारपछि दुई हजार २६४ जना निको भएका छन् ।
दमकमा आम्दा र दमक अस्पतालले कोरोना संक्रमितको उपचार गरिरहेका छन् । ती अस्पतालमा हाल ५१ जना उपचाररत छन् । अस्पतालका सबै शय्या भरिएका छन् ।
शिवसताक्षी नगरपालिकाले पनि सोमबारदेखि पूर्ण लकडाउनमा जाने निर्णय गरेको छ । नगरमा हाल १४४ जना सक्रिय संक्रमित छन् । त्यहाँ दोस्रो लहरका क्रममा १४ जना मृत्यु भएको छ ।
