२८ साउन, काठमाडौं । साताको अन्तिम कारोबार दिन दोहोरो अङ्कले वृद्धि हुँदा सेयर बजार परिसूचक नेप्सेले नयाँ उचाइ कायम गरेको छ । बुधबार ३१६२.६० अङ्कमा बन्द हुँदा नयाँ उचाइ कायम गरेको नेप्से आज १६.३२ अङ्कले वृद्धि हुँदा ३१७८.९१ अङ्कको नयाँ उचाइमा पुगेर बन्द भएको छ ।
बुधबारको भन्दा बजार परिसूचकसँगै कारोबार रकम पनि बढेको छ । बुधबार साढे १५ अर्बको कारोबार भएकोमा आज नेप्से ३ करोड ६६ लाख ८ हजार ४६१ कित्ता सेयर किनबेच हुँदा १७ अर्ब ५१ करोड ३२ लाख ७६ हजारको कारोबार भएको छ ।
आज नेप्सेमा कारोबार भएको मध्ये ७ कम्पनीको सेयर मूल्य बढेर सर्किट लेभलमा बन्द भएको छ । सेयर मूल्य बढेर सर्किट लेभलमा बन्द हुनेमा महालक्ष्मी विकास बैंक, कामना सेवा विकास बैंक, शाइन रेसुङ्गा विकास बैंक, माउन्टेन इनर्जी नेपाल, रुरु जलविद्युत् कम्पनी जिवन विकास लघुवित्त र युनियन लाइफ इन्स्योरेन्स रहेका छन् ।