धनगढी । सुदूरपश्चिम प्रदेशमा नेकपा (माओवादी केन्द्र) का नेता खगराज भट्ट संसदीय दलको नेतामा सर्वसम्मत चयन हुनुभएको छ । आइतबार बिहान प्रदेश संसदीय दलको कार्यालयमा भएको बैठकमा भट्ट सर्वसम्मत चयन हुनुभएको हो ।
नेता भट्ट माओवादी केन्द्रका स्थायी कमिटी सदस्य तथा प्रदेश इन्चार्जसमेत हुनुहुन्छ ।
दलको नेतामा केन्द्रीय सदस्य ओमविक्रम भट्टलेसममेत दाबी गर्नुभएको थियो तर अन्तिम समयमा उहाँले भट्टलाई समर्थन गर्नुभयो ।
यसअघि शनिबार बसेको संसदीय दलको बैठकमा दुवै नेताले दाबी नछाड्दा सहमति हुनसकेको थिएन । भट्ट डडेल्धुरा निर्वाचन क्षेत्र ९१० बाट निर्वाचित हुनुभएको थियो । नेपाली कांग्रेस नेतृत्वको तत्कालीन गठबन्धनका साझा उम्मेदवार रहनुभएका भट्टलाई भावी मुख्यमन्त्रीका रुपमा अघि सारिएको थियो ।
उहाँलाई मुख्यमन्त्री बन्ने बाटो खुलेको छ । नेकपा(एमाले) नेतृत्वको नयाँ गठबन्धनमा समेत सुदूरपश्चिम प्रदेशको मुख्यमन्त्री माओवादी केन्द्रलाई दिइने सम्भावना रहेको छ ।
