काठमाडौं । अवैध लागूऔषध गाँजासहित वीरगञ्जबाट दुई महिला पक्राउ परेका छन् । प्रहरीले मकवानपुर राक्सिराङ गाउँपालिका–२ की ४२ वर्षीया इन्द्रकुमारी चेपाङ र ४२ वर्षीया फुलमाया स्याङ्बोलाई १० किलो गाँजासहित पक्राउ गरेको हो ।
वीरगन्ज महानगरपालिका–२१ हनुमानचोकस्थित सडक खण्डमा प्रहरी चौकी परवानिपुरबाट खटिएको चेकिङ टोलीले सवारीसाधन जाँच गर्ने क्रममा शनिबार नारायणगढ चितवनबाट वीरगन्ज तर्फ आउँदै गरेको ना ४ ख ५९३७ नम्बरको सार्वजनिक बसमा जाँच गर्दा उक्त बसको पछाडिको सिटमा बसेका ती महिलाहरूको छेउमा राखिएको पिठ्युमा बोक्ने कालो रंङको २ वटा झोलाबाट उक्त लागूऔषध बरामद गरेको थियो ।
उक्त झोला भित्र हरियो प्लाष्टिकले बेरेर राखिएको १० किलो लागूऔषध गाँजा फेला परेको थियो । उनीहरुविरुद्ध लागूऔषधसम्बन्धी कसुरमा थप अनुसन्धान भइरहेको जिल्ला प्रहरी कार्यालयका प्रवक्ता एवं सूचना अधिकारी डीएसपी कुमारविक्रम थापाले जानकारी दिए ।
