जितः यल जिं छु याये ?
खाताय् ग्वारातुलाः कोथाया प्यखेरं मिखा चाःहिका च्वना । जिं खना, कोथाय् थिङ्ग दनाच्वंम्ह तुयूम्ह नसा ख्वाउँकीम्ह फ्रीज, हुनुनु सः वयेकाः मे हालाः नसा बुकीम्ह माइक्रोओभन, छन्त गुलि तांन्वः हला धकाः थःगु न्यापा ल्हाः चाःहिकाः हुरुरुरु फय् त्वःता च्वंम्ह फाय्न (पंखा), फेतुइबलय् म्ह हे याउँसे च्वंकीम्ह हाकुगु लेदरयागु सोफा, हानं कुनय् लाक्क च्वंगु वसः तयेगु दराज फुक्कसिनं जितः थःपिनिगु सेवा बीत न्वाना च्वन ।
छिकपिन्सं धाइ हला ! थ्व मनुखं छु धयाच्वंगु जुइ, कोथाय्, खाताय् ग्वारातुलाः मिखाया न्ह्यःने भान्छा निसें वैठक व धुकू तक दुगु थें वर्णन यानाच्वंगु दु । तर …… खँ …… जुयाच्वन छु धाःसा— खुला दइन जि नेपालं अमेरिकाय् वयागु । क्यालिफोर्निया सानफ्रान्सिस्कोया छकू कोथाय् जि पासा नाप च्वंच्वनागु । थन अपार्टमेन्टया भाः तसकं हे थिके । उकें खर्च म्हो चायेकेत पासानाप मिले जुयाः मोटेलय् कोथा कयाः च्वनागु । थथे जुइबलय् जिं ४५० डलर महिनाया पूसा गाः । स्यू ला छिकपिंसं, नेपालय् व हे पासाया ग्वहालिं जिं नं नेपाली रेष्टुरेन्टय् कुक ज्या याये खन । खय्त ला जि मल्टिपरपोज भिसाय् वयागुलिं ज्या याये मज्यू । तर छु याये ! डलर माःगु देसय् नेपालं ज्वना वयागु दामं गुलि हे नयेत गाइ धकाः । उकिं वर्क परमिट मदुपिन्सं सरकारी रेट मखु कम रेटय् ज्या याना च्वनेमाःगु बाध्यता दया च्वनी । ज्या यो मजू धयागु स्यूसां हे सुचुकाः ज्या यानाः डलर कमे जुया च्वंगुलिं नुगः लय्ताः ।
दां कमे जूगुलिं जक लय्लय्ताःगु मखु …… खँ छता मेगु हे दनि का । मनया खँ धायेत नं जितः सा¥है मछाःसे च्वं । तर छु याये, खँ मधासें हे मफुत । उकें मछाःसे च्वंसां जितः धायेमाल का छु याये ?
जितः पासापिंसं हाय्ण्डसम हिरो धकाः हायेकीगु । जिगु उमेर नं स्वीदँ क्यन । थ्व उमेरय् भचा हाय्ण्डसम ला जुइगु स्वाभाभिक नं खत । हाकनं जि भचा बांलाक जुइमाःम्ह । न्ह्याम्ह नाप नं न्ह्यैपुक खँ ल्हायेमाःम्ह । उकिं जि भचा चञ्चल स्वभावयाम्ह । गाक्कं स्वतन्त्रता दुगु अमेरिकाय् ला झन् मन चञ्चल मजुइगु खँ हे मन्त । उकिसं बाँबांलाःपिं ल्यासेत खनकि ला मन ला भंmगः ब्वः थें ब्वइगु हे जुल मखु ला ? नेपालय् नं जिगु मनचञ्चल । तर छु याये कुलयागु इज्जत व मांअबुया स्वभाव कडा जूगुलिं नुगः कय्कुंकाः च्वनेमाल । तर थन स्वतन्त्रता दुगुलिं जिगु मन आकासय् ब्वइपिं झंगःत थें न्ह्याबलें ब्वया जक च्वनी । जि पासाया गलफ्रेण्ड मिनु तसकं हे बांलाः । मुसुमुसु न्हिलाः खँ ल्हायेमाःम्ह । तर पासा धाःसा भतिचा हे खँ मल्हाइम्ह । हानं उलि बांलाका जुइ नं मसः । तर जि जुयाच्वन यक्व खँ ल्हायेमाःम्ह । सुंक हे च्वने मफुम्ह । उकें न्ह्याबलें जिपिं स्वम्ह गनं वनेबलय् मिनु व जि यक्व ख्याः यानाः न्हिलाः न्हिलाः खँ ल्हायेगु ।
पिकनीक व पार्टी जुइबलय् ला मिनु नापं अप्वः प्याखं ल्हुइगु याना । हानं छु जुइगु, पार्टीइ प्याखं ल्हुयागु दिनया बहनी द्यने त्यलकि न्ह्यः हे वइमखु । खाली पार्टीइ मिनु नाप प्याखं ल्हुयागु किपा जक मिखाया न्ह्यःने न्ह्यःने बारम्वार वयाच्वनीगु का ! थज्यागु खँ सुयातं धाये ज्यूगु नं मखु छु याये !
नेपालय् थें थन नमस्कार मखु, मनूत नापलातकि चाहे व मिसा जुइमा या मिजं जुइमा हग यायेगु चलन । हग यायेगु धैगु घय्पुयाः आत्मीयता क्यनेगु खः । जितः थ्व चलन तसकं यक्व हे यः । उकें मिनुयात नापलानाः हग याये दतकि साप हे लय्ताः । स्वतन्त्र देश जूगुलिं थन मिजं मिसायागु मेलजोलयात मनूतसें उलि च्यूताः काइमखु । उकें जि नं मिनुनाप ख्याः यानाः न्हिलाः खँ ल्हायेगु, गुबलें गुबलें ल्हाः ज्वनाः नं खँ ल्हायेगु याना । मिनु नाप जि यक्व हेलमेल जूसां पासां जितः गुबलें नं छुं मधाः । जि पासा यक्व हे भलादमी, तसकं हे सोझा । मिनुया जि प्रति छु धारणा दु जिं छुं हे मस्यू । अय्सां मिनुप्रति जिं आकर्षक जुजुं वन । आकर्षित जुजुं आः ला आकर्षण मतिनाय् हिला वन ।
छकः निकः विचार वइ, मिनुया जि प्रति छु विचार दु थें । वयात नं जि यःला थें नं च्वं । थय्क विचार यायेबलय् ला । छाय् धाःसा जितः मयःसा ला व जि नाप उलि अप्वः हेलमेल नं ला याइमखु जुइ का मखु ला हला ? तर …… छु याये ? वयात न्यने ज्यूगु मखु ।
उफ् …… उफ्, हरे हरे, गय् च्वंक थाकु का मनया खँ मनय् तया तयेबलय् ।
नयेगु निसें कोथाया बाः पुलेगु तक पासा व जि निम्ह मिलय् जुयाः याना च्वना । व हे पासाया गलफ्रेण्डनाप जिगु मतिना जुल । जिं स्यू, जिं चाः, थथे विचार यायेगु तक नं पाप खः । मद्दतगार पासा उपरय् विश्वासघात यायेगु खः । अफसोच ! जितः यल, जिं छु याये । अफसोच ! जितः यल, जिं छु याये ।
-रीतादेवी प्रधान (जोशी)रूमाठ
फोन : ४१५–६९१–०८३१
