काठमाडौं – भारतका नीति तथा योजनाविद् अमिताभ कान्तले आर्थिक विकासमा नेपाल र भारत एक अर्काका परिपूरक रहेको बताएका छन् । शनिबार बाह्रखरी गल्फ तथा आर्थिक परिसंवादमा बोल्दै उनले यस्तो बताएका हुन् ।
स्थिर, समृद्ध र सार्वभौम नेपाल भारतको हितमा रहेको उनले बताए । बलियो र गतिशील भारतले नेपालका लागि व्यापार, लगानी, ऊर्जा सेवा र प्रविधिको क्षेत्रमा नयाँ सम्भावनाका अवसर प्रदान गर्ने उनले बताए ।
“व्यापार र लगानीले हाम्रो आर्थिक सम्बन्धको प्रगाढतालाई उजागर गर्छ । भारत नेपालको सबैभन्दा ठूलो व्यापारिक साझेदार, प्रमुख निर्यात बजार र तेस्रो मुलुकसँगको व्यापारका लागि मुख्य पारवहन मार्ग हो,” उनले भने, “नेपालमा लगानी गर्ने प्रमुख लगानीकर्ताहरूमा भारतीय कम्पनीहरू अग्रपंक्तिमा छन् ।”
भारत र नेपालको सम्बन्ध भूगोलले मात्रै नभएर आस्था, संस्कृति, परिवार, व्यापार र भाषाले जोडिएको उनको भनाइ छ । यस्तै, तीर्थस्थल, नदीनाला, र खुला सीमानाले दुई मुलुकको आत्मीयतालाई थप प्रगाढ बनाएको उनले बताए ।
