काठमाडौं –प्रमुख प्रतिपक्षी दल नेपाली कांग्रेस ले प्रधानमन्त्रीलाई प्रतिनिधिसभामा उपस्थित गराउन सभामुखसँग रुलिङको माग गरेको छ ।
बिहीबार प्रतिनिधिसभा बैठकको आकस्मिक समयमा बोल्दै कांग्रेस सचेतक निश्कल राई ले प्रधानमन्त्री र सरकारलाई सदनप्रति जवाफदेही बनाउन प्रधानमन्त्रीको उपस्थिति आवश्यक रहेको बताए ।
उनले सरकार सदनप्रति जवाफदेही नभएसम्म प्रतिपक्षको विरोध जारी रहने चेतावनी दिए । “हिजो निलो स्कार्फ बाँधेर विरोध गरियो, आज प्लेकार्ड प्रदर्शन गरिएको छ । सरकार र प्रधानमन्त्री जिम्मेवार नभएसम्म यस्ता गतिविधि रोकिन्नन्,” उनले भने ।
राईले पछिल्ला केही बैठकदेखि प्रतिपक्षी दलले सरकारलाई जवाफदेही बनाउन खोजे पनि सभामुखबाट अपेक्षित साथ नपाएको गुनासो गरे । उनले सरकार र प्रधानमन्त्रीलाई सदनप्रति “एलर्जी” भएको जस्तो व्यवहार देखिएको टिप्पणी समेत गरे ।
त्यस्तै, “परम्परा भत्काउँदैछु” भन्ने नाममा सरकारले व्यवस्थापिका, कार्यपालिका र न्यायपालिकामा हस्तक्षेप गरिरहेको आरोप पनि उनले लगाए ।
