जितः आनन्द जुल
ओहो ! न्हयदँ च्यादँ लिपा प्यला न्याला दत जितः साप हे आनन्द जुयाच्वन । गुबलें गुबलें याकःचा कोथाय चुकू तयाः मुसुमुसु न्हिलाः न्हायकं स्वयाः थःगु ग्वाय थःम्हेस्यां पुयाच्वने मास्ते वः का स्यू ला छिकपिंसं । छेँ, परिवारया न्ह्यःने थःगु थ्व पहः क्यने ज्यूगु मखु छु याये ?
+ + +
खँ छु जुल धाःसा, जि न्हयदँ च्यादँ दत डिभी भीसा लानाः परिवार याने श्रीमति व १४ दँ (वर्ष) दुम्ह काय, १५ दँ दुम्ह म्ह्याय ज्वनाः अमेरिकाया क्यालिफोर्नीयाया सानफ्रान्सीस्को सहरय वया च्वनागु ।
जिं ई (समय) यागु सदुपयोग याना वयाः छुं महिना लिपा हे थः इन्जीनियर जूगुलिं थन नं इन्जीनियर कोर्ष कयाः ब्वना । कम्प्यूटर इञ्निाीएर जुयाः ज्या याना च्वना । कमाई बांलाःसां जितः म्वाःमदुगुलिइ धन खर्च याये मास्ते मवः । जि अप्वः ध्यबा खर्च याये मज्यू धैगु पक्षयाम्ह खः ।
नेपालय संयुक्त परिवारय च्वना च्वनाम्ह । तर थन चिधंगु परिवारय जिवन बिते याये दुगुलिं ला जिमि तिरिमैंयाया तुति बँय मलाः का । सुरु सुरुइ जिं “मिसा छ बि.ए. पास जूम्ह खः …… उकें थन नं आखः ब्वनाः माष्टर याये मज्यू ला धयां वं तुरुन्त हे लिसः बिल— “जितः आखः ब्वनेमाःगु मदु । बरु ब्यूटिपार्लरय ज्या यानाः कमे यायेगु का” धाल । गथे धाल अथे हे यानाः वं थःगु न्हि छ्वया च्वन । एक त बांलाःम्ह कलाःचा, उकेसं कमाइ दुगुलिं वसः, मेकअप, तिसाया लागि बेफीक्रि ध्यबा खर्च याइम्ह छुयाय ? जिं खर्च भचा कम या धाःसा “मिं पुइ थें” सेताक्क जवाफ बी— “ल्यासेबलय बांलाका मजूसा बुरी जुइबलय बांलाका जुइगु ला ?”
जि काय व म्ह्याय नं थौं कलेजय ब्वनीपिं जुइ धुंकल । थनयागु वातावरणं यानाः नेपालय जिं धया थें खँ न्यनीपिं मस्त आः वयाः जिगु खँ मन्यनीपिं जुल । “यःयःथे यानाः जुइगु” ला धाल कि “बाः थ्व नेपाः मखु, थ्व अमेरिका खः, उकें छिं नं नेपाःयागु बिचार मखु अमेरिकायागु थें बिचार यानाः जुयादिसँ” धयाः लिसः बीगु छु याये ।”
+ + +
अप्वः यानाः १५ दिनया छकः किमो मांम्हेसिनं पासापिं सःताः पार्टी याइ, कि मस्ततय पासापिं सःताः पार्टी यानाः म्वाःमदुगु ध्यबा खर्च यानाः छेँय हल्ला खल्ला यानाः दिन बिते याना छ्वया च्वनी । जितः इमिगु थ्व चाला स्वये मयः । तर छु याये ! जिं धाये ज्यूगु छुं हे मखु । जिं थथे पार्टी यानाः ध्यबा खर्च यायेमते धालकि मां व मस्त स्वम्हेस्यां नं लिसः बी — “थःपिं करपिंथाय जक नःवनेगु ला ? थःपिन्सं नं ला सःताः नकेमाः नि मखु ला बाः ……” इमिगु न्ह्यसःयात जिं म्वाःम्वाकं लिसः बीगु मयाना । बरु इमिगु ख्वाः “पाकः मिसायात भाःतं” स्वः थें जक त्वालां त्वालां स्वयेगु याना । छु याये “एक्लो वृहस्पति झुठ” धाः थें जि याकःचा । इमिगु न्ह्यःने सहः याना च्वनेमाः का ।
जि कलाःया ज्या व पासापिं नाप ईब्यः मदयेक चाःचाः हिलाः नयेगु बानीं यानाः जितः ला मनय यक्व तं नं वः । द्यःयाके फ्वने मास्तेवइ, हानं विचार वइ— “हरे ! हे भगवान्, थ्व मिसायागु चाःचाः हिलाः नयेगु बानीयात छकः त्वाःल्हाना बियादिसँ रे ।”
कलाः जक खः ला, मस्तयगु ब्यवहारं नं जितः वाक्क वये धुंकल । मस्त नं घौ पलख हे छेँय बौनाप च्वनाः न्हि छ्वयेगु धयागु हे मदु का । परिवारया पहःचहः खनाः मनं मनं दिक्क व नुगः ख्वया च्वन जि ।
गनं गनं हलिंन्यंक कोरोनाया भयाबहः प्रकोप जूबलय ला थन अमेरिकाय नं थ्व प्रकोपं जाल पैmलय याःबलय ला …… जि तिरिमैंया नं ज्याय वनेगु । पासापिं नाप रमझम यायेगु बन्द जुल । जि चान्हिं अनलाइनय ज्या याना च्वना । हानं मस्तय नं कलेज वनेगु बन्द जुल । तर अनलाइन क्लास ला छेँय च्वनाः वनीगु जुल । थथे जूबलय ला छेँय पार्टीयागु चलहपहल नं मन्त । मस्तय नं पासापिं नाप चाःचाःहिलाः दिन छ्वयेगु नं बन्द जुल ।
+ + +
कोरोनां यानाः छेँय च्वने माःगुलिं परिवारया ख्वाः ला न्ह्याबलें नं “सिमां कुतुंवःम्ह माकः थें” जुया च्वनीगु का । अझ धायेगु खःसा “कुकु हाःम्ह माखा थें भुग्लुं” च्वं का स्यू ला छिकपिंसं ।
खयत ला जितः नं कोरोना खनाः मनय यक्व यक्व त्रास दु । अयसां कोरोनां यानाः जिमि छेँय लच्छिया निकः पार्टी यानाः होहल्ला याःगु, बेकारय ध्यबा खर्च यायेगु रोकय जुल । अझ मेगु ला जितः दकलय यःगु खँ— तिरिमैंया व मस्तयगु स्वच्छन्दता ज्या मदयेक चाःचाःहिलाः नयेगु नं कम जूगुलिं मन ला सा¥है लयलय ताः ।
उकें कोरोना शुरु जूगु दिननिसें
“जितः आनन्द जुल ।”
“जितः आनन्द जुल ।”
-रीतादेवी प्रधान (जोशी) रूमाठ
फोन ः ४१५–६९१–०८३१
