काठमाडौँ – अमेरिकी राष्ट्रपति डोनाल्ड ट्रम्पले इरानमाथि पुनः घातक सैन्य हमला हुनसक्ने चेतावनी दिँदै आवश्यक परे अमेरिकाले पूरै देश नियन्त्रणमा लिन र त्यहाँको सम्पूर्ण तेल कब्जा गर्नसक्ने विवादास्पद दाबी गर्नुभएको छ । फ्लोरिडामा आयोजित एक ¥यालीतर्फ प्रस्थान गर्नुअघि ह्वाइट हाउसमा पत्रकारहरूसँग कुरा गर्दै ट्रम्पले इरान अहिले निकै कमजोर भइसकेको र प्रतिकार गर्ने हैसियतमा नरहेको जिकिर गर्नुभयो । फ्लोरिडा प्रस्थान गर्नुअघि ह्वाइट हाउस बाहिर सञ्चारकर्मीहरूसँग संक्षिप्त संवाद गर्दै राष्ट्रपति ट्रम्पले इरानविरुद्ध थप आक्रामक बन्ने संकेत गर्नुभयो ।
उनले भने, ‘इरानले अहिले धेरै केही गर्न सक्ने अवस्था छैन । यदि हामीले चाहेको खण्डमा त्यहाँको सबै तेल कब्जा गर्न सक्छौँ, पूरै देश नै आफ्नो नियन्त्रणमा लिन सक्छौँ । रणनीतिक स्ट्रेट अफ हर्मुज जलमार्ग पनि पूर्ण रूपमा हाम्रो नियन्त्रणमा छ ।’
संयुक्त राष्ट्रसंघका लागि अमेरिकी राजदुत माइक वाल्ट्जले इरानसँगको द्वन्द्व अझै एक वर्षसम्म लम्बिन सक्ने भनी दिएको अभिव्यक्तिबारे पत्रकारहरूले सोधेको प्रश्नमा ट्रम्पले अमेरिकाले चाहेमा यो विवाद तुरुन्तै समाप्त गर्न सक्ने धारणा राख्नुभयो ।
‘हामी यसलाई निकै छिटो टुंग्याउन सक्छौँ । प्रश्न केवल यति हो– के हामी यसलाई तत्काल सिध्याउन चाहन्छौँ वा बिस्तारै कमजोर हुन छाडिदिने हो ?’ ट्रम्पले जवाफमा भन्नुभयो ।
ह्वाइट हाउसको भनाइपछि फ्लोरिडामा आयोजित जनसभालाई सम्बोधन गर्दै ट्रम्पले इरानविरुद्ध थप सैन्य कारबाहीको सम्भावनालाई थप जोड दिनुभयो । उहाँले गत फेब्रुअरी २८ मा इजरायलसँगको समन्वयमा सञ्चालन गरिएको वृहत सैन्य कारबाहीलाई स्मरण गराउँदै फेरि अर्को ‘एपिक फ्युरी’ जस्तो प्रहार हुनसक्ने बताउनु भयो ।
अमेरिकी र इजरायली सेनाले अमेरिकी मध्यावधि निर्वाचनलगत्तै इरानका रणनीतिक संरचनाहरूलाई लक्षित गरी नयाँ आक्रमणको योजना तयार पारेको समाचारहरू बाहिरिएका बेला ट्रम्पको यस्तो कडा टिप्पणी आएको हो । यद्यपि, राष्ट्रपति ट्रम्पले आगामी दिनमा नयाँ सैन्य आक्रमणका लागि अन्तिम अनुमति दिन्छन् वा दिँदैनन् भन्ने विषय भने अझै अनिश्चित रहेको अमेरिकी सञ्चारमाध्यमहरूले जनाएका छन् ।
