काठमाडौँ- म्यारियट इन्टरनेसनल र सिजी कर्प ग्लोबलबिच नेपाल र भारतमा तीन वटा नयाँ सुविधा सम्पन्न होटेलहरू सञ्चालन गर्ने सम्बन्धमा सम्झौता भएको छ ।
आइतबार काठमाडौँमा आयोजित एक विशेष समारोहमा म्यारियट इन्टरनेसनलका अध्यक्ष डेभिड म्यारियटले यस साझेदारीको घोषणा गर्नुभएको हो ।
सम्झौताअनुसार काठमाडौँमा ‘द रिट्ज–कार्लटन’ र ‘द वेस्टिन’ तथा भारतको सिलिगुडीमा ‘जेडब्लु म्यारियट’ होटल सञ्चालनमा आउनेछन् ।
यी तीन वटा प्रतिष्ठित ब्रान्डहरूको विस्तारसँगै दक्षिण एसियाली क्षेत्रमा विलासी आतिथ्य (लक्जरी हस्पिटालिटी) र पर्यटन प्रवर्द्धनमा नयाँ आयाम थपिने विश्वास गरिएको छ । कार्यक्रमलाई सम्बोधन गर्दै अध्यक्ष डेभिड म्यारियटले सिजी कर्प ग्लोबलसँगको बढ्दो सम्बन्धप्रति खुसी व्यक्त गर्नुभयो ।
उहाँले भन्नुभयो, ‘आजको सम्झौता म्यारियट इन्टरनेसनल र सिजी कर्प ग्लोबलबिचको सम्बन्धमा एउटा महत्त्वपूर्ण कोशेढुंगा हो। यी नयाँ होटलहरूले हाम्रा सहयोगीहरूका लागि वृद्धिको अवसर, लगानीकर्ताका लागि प्रतिफल र पर्यटकहरूका लागि उत्कृष्ट अनुभव प्रदान गर्नेछन् ।’
नेपालको प्राकृतिक सुन्दरता र यहाँको आतिथ्य संस्कारको प्रशंसा गर्दै अध्यक्ष म्यारियटले नेपालमा पर्यटन पूर्वाधारको विकास र विस्तारका लागि म्यारियट प्रतिबद्ध रहेको बताउनु भयो ।
उहाँले सिजी कर्प ग्लोबलका अध्यक्ष विनोद चौधरी र सिजी हस्पिटालिटीका प्रबन्ध निर्देशक राहुल चौधरीसँगको दीर्घकालीन साझेदारीले पर्यटन अर्थतन्त्रलाई थप सबल बनाउने विश्वास समेत व्यक्त गर्नुभयो ।
अध्यक्ष म्यारियटले म्यारियट इन्टरनेसनल आफ्नो स्थापनाको १०० औँ वर्षतर्फ उन्मुख भइरहँदा यस्ता साझेदारीले मानिसहरूलाई जोड्ने र पुस्तौँसम्म दिगो सम्बन्ध कायम राख्न मद्दत गर्ने धारणा राख्नुभयो । यो सहकार्यले नेपालको पर्यटन क्षेत्रमा उच्चस्तरीय सेवाको सुनिश्चितता गर्ने र अन्तर्राष्ट्रिय जगतमा नेपालको छवि थप उच्च बनाउने लक्ष्य राखेको छ ।
कार्यक्रममा सिजी हस्पिटालिटीका प्रबन्ध निर्देशक राहुल चौधरीले यो साझेदारीले नेपालको पर्यटन तथा हस्पिटालिटी क्षेत्रको सम्भावनामाथि म्यारियटको उच्च विश्वासलाई झल्काएको बताउनु भयो ।
सिजी र म्यारियटबिचको व्यावसायिक सम्बन्ध छोटो समयमै निकै सुदृढ बनेको बताउँदै उहाँले दुई वर्षअघि फिलिपिन्सको चर्चित ‘द फार्म एट सान बेनिटो’लाई म्यारियटको ‘अटोग्राफ कलेक्सन’मा आवद्ध गरेको बताउनु भयो । भारतमा ‘फर्न’ ब्राण्डअन्तर्गत म्यारियटसँगको सहकार्यमा हाल करिब १ सय ५० होटेलहरू सञ्चालनमा रहेका छन् भने सन् २०३१ सम्ममा सो सङ्ख्या ५ सय पुर्याउने लक्ष्य राखिएको छ । यसबाहेक दुबईमा ‘जेडब्लु रेजिडेन्सेस’को निर्माण समेत अघि बढिसकेको छ ।
उहाँले भन्नुभयो, ‘यो दिन नेपालका लागि अत्यन्त विशेष र महत्त्वपूर्ण छ । विश्वका प्रतिष्ठित ब्रान्डहरूको आगमनले नेपाललाई विश्व हस्पिटालिटी मानचित्रमा नयाँ उचाइमा पुर्याउने छ ।’
नेपालमा यी परियोजनाहरूलाई सफल बनाउन सिजी डेभलपर्ससँगै आईजी ग्रुप, आईसीजी ग्रुप, शर्मा कन्स्ट्रक्सन, एमएलई ग्रुप र एमएलए ग्रुपले साझेदारी गरेका छन् ।
सरकारको पर्यटन केन्द्रित भिजनलाई आत्मसात् गर्दै यी अन्तर्राष्ट्रिय ब्रान्डहरूको उपस्थितिले नेपाललाई विश्व स्तरीय पर्यटकीय गन्तव्यको रूपमा स्थापित गर्न महत्त्वपूर्ण भूमिका खेल्ने विश्वास लिइएको छ ।–न्युज एजेन्सी नेपाल
