मंगलवार बसेको प्रतिनिधि सभा बैठकमा बोल्दै सांसद कँडेलले विपद् व्यवस्थापनका लागि सरकारले परिचालन गरेको आर्थिक स्रोतको पारदर्शितामाथि प्रश्न उठाउनुभएको हो । उहाँले विपद्का समयमा संकलन तथा परिचालन हुने कोषको रकम कहाँबाट कति जम्मा भयो र कुन–कुन शीर्षकमा खर्च भयो भन्ने विवरण संसद्मा प्रस्तुत गर्नुपर्ने बताउनुभयो ।
सांसद कँडेलले स्थानीय तह, प्रदेश सरकार तथा राष्ट्रिय विपद् जोखिम न्यूनीकरण तथा व्यवस्थापन प्राधिकरणसम्म कति रकम पुगेको छ र त्यसको प्रभावकारिता कस्तो रह्यो भन्नेबारे पनि संसद्लाई जानकारी गराउनुपर्नेमा जोड दिनुभयो ।
उहाँले भन्नुभयो, ‘विपत्तिमाथि विपत्ति आइरहेको सन्दर्भमा कोषहरूको यथार्थ विवरण सार्वजनिक नहुनु दुःखद् छ । प्रधानमन्त्री दैवी प्रकोप उद्धार कोष र राहत कोषको खर्चको स्पष्ट विवरण यो सम्मानित संसद्मा पेश हुनुपर्छ ।’
विपद्का समयमा सरकारले संकलन तथा परिचालन गरेको रकमको पारदर्शी लेखाजोखा हुनुपर्ने बताउँदै उहाँले यसबाट नागरिकको विश्वास बढ्ने धारणा राख्नुभयो । सांसद कँडेलको मागसँगै विपद् व्यवस्थापनमा प्रयोग हुने सरकारी वित्तीय स्रोतको परिचालन र वितरण प्रणालीबारे संसद्मा थप बहसको आवश्यकता देखिएको छ ।
