नेपालबाट अमेरिकी नागरिकको उद्धार गरी स्वदेश फर्काउन राम्रो पहल गरेको भन्दै नेपालका लागि अमेरिकी राजदूत र्याण्डी बेरीले नेपाललाई धन्यवाद दिएका छ न्।
नेपालमा रहेका ३०२ अमेरिकी नागरिकलाई मङ्गलबार अमेरिका पठाएलगत्तै उनले नेपाल सरकार लगायत विभिन्न निकायलाई धन्यवाद दिएका हुन् ।
“अमेरिकी नागरिकलाई फर्कने काममा सहयोग सद्भाव राख्नुहुने तपाईंहरू सबैलाई हाम्रो धेरै धेरै धन्यवाद,” उनले ट्विटर र भिडियो सन्देश मार्फत भनेका छन्।
आतिथ्य सत्कारको महत्वपूर्ण उदाहरण नेपालले प्रस्तुत गरेको भन्दै उनले परराष्ट्र मन्त्रालय, अध्यागमन विभाग, नागरिक उड्डयन प्राधिकरण र नेपाल पर्यटन वोर्डको कामको सराहना गरेका छन् ।
अलपत्र परेका पर्यटकलाई खाना खुवाउने व्यवसायी, सहयोग गर्ने गाइड समेतको उनले प्रशंसा गरे । नेपाल र अमेरिकाको ७० वर्षे सम्बन्धको यात्रामा यसपटकको सहयोगले सहकार्यको जग झन् बलियो बनाएको अभिव्यक्ति राजदूत बेरीले भिडियो सन्देशमा दिएका छन् । अहिले घर फर्केर गए पनि पर्यटकका रूपमा उनीहरु पुनः नेपाल आउने विश्वास राजदूत बेरीले व्यक्त गरेका छन् ।
