काठमाडौँ – गभर्नर डा. विश्वनाथ पौडेलले सम्पत्ति विवरण सार्वजनिक गरेका छन् । जसअनुसार उनीसँग करिब २३ करोड सम्पत्ति रहेको छ ।
गभर्नर नियुक्त भएपछि सम्पत्ति विवरण सार्वजनिक गर्नुपर्ने व्यवस्था अनुसार उनले सम्पत्ति विवरण नेपाल राष्ट्र बैंकमा बुझाएका हुन् ।
उनीसँग दुई स्थानमा घरजग्गा रहेको छ । दुवै स्थानको जग्गा श्रीमती प्रतिभाको नाममा रहेको छ । ललितपुरमा श्रीमती प्रतिभाको नाममा ५ आना २ दामको जग्गामा २७९५ वर्गफिटको घर छ ।
यस्तै, पैतृक सम्पत्ति र स्वआर्जनबाट उनले १ करोड ५५ लाख रूपैयाँमा यो घरजग्गाको किनेको उल्लेख गरेका छन् । नवलपरासीको गैंडाकोटमा पैतृक सम्पत्ति र स्वआर्जनबाट उनले ६० लाख रूपैयाँमा घर किनेको खुलाएका छन् ।
गभर्नर पौडेलसँग ४५ तोला सुनका गहना छन् । त्यस्तै, करिब १५ लाख रूपैयाँ बराबरको हिरा छ । सुन पैतृक रूपमा पाएको उनले उल्लेख गरेका छन् ।
पौडेल र उनको पत्नीका नाममा बैंकमा २० लाख ६८ हजार रूपैयाँ बचत छ । उनको पत्नीको खातामा ४४ सय ४६ अमेरिकी डलर छ । पौडेलले आफ्नो र पत्नीको नाममा गरेर १४ करोड रूपैयाँभन्दा बढीको सेयर रहेको देखाएका छन् ।
उनको सानिमा बैंक, सानिमा माई हाइड्रो, सानिमा मिडल तमोर हाइड्रो, ग्लोबेको प्रालि, संयुक्त ऊर्जा हाइड्रोपावर र चितवन इनर्जी लिमिटेडमा सेयर रहेको छ ।
पौडेलको पत्नीका नाममा ४४ लाख रूपैयाँमा खरिद गरेको सुजुकी कार रहेको उनले विवरणमा उल्लेख गरेका छन् ।
