काठमाडौँ – संघीय निजामती सेवा विधेयकको पतिवेदनमा भएको त्रुटि छानबिन गर्न बनेको संसदीय विशेष छानबिन समितिले सोमबार छानबिन प्रतिवेदन बुझाउने भएको छ ।
समितिको म्याद आज (आइतबार) सकिने भएकाले सोमबारको प्रतिनिधिसभामा बैठकमा प्रतिवेदन बुझाउने तयारी भइरहेको सदस्यहरूले बताएका छन् ।
विधेयकमा रहेको कुलिङ पिरियडको प्रावधानलाई निष्प्रभावी बनाउने भाषा प्रयोग गरिएको भनेर प्रश्न उठेपछि प्रतिनिधिसभाले विशेष छानबिन समिति गठन गरेको थियो ।
गत २३ असारमा गठित समितिलाई सुरुमा २१ दिनको समय दिइएको थियो । पछि फेरि एक साता म्याद थप गरिएको थियो । जसको म्याद आज सकिने भएकाले सोमबारको बैठकमा प्रतिवेदन बुझाउने तयारी गरिएको हो ।
समितिमा नेपाली कांग्रेस र नेकपा एमालेबाट दुई–दुई जना सदस्य र माओवादी केन्द्र, रास्वपा र राप्रपाबाट एक–एक जना रहेका छन् । कांग्रेसका सांसद जीवन परियारको सभापतिमा बनाइएको समितिमा सुशीला थिङ, नारायणप्रसाद आचार्य, ईश्वरी घर्ती, माधव सापकोटा, गणेश पराजुली र रोशन कार्की सदस्य छन् ।
