काठमाडौं – जिल्ला अदालत पर्साले राष्ट्रिय स्वतन्त्र पार्टी (रास्वपा) का सभापति रवि लामिछानेविरुद्ध सानो पाइला सहकारी ठगी प्रकरणमा लगाइएको संगठित अपराधको आरोप हटाउने आदेश दिएको छ।
महान्यायाधिवक्ताको निर्णयअनुसार सरकारी वकिलहरूले आरोपपत्र संशोधनका लागि अदालतमा निवेदन दिएका थिए। सोही निवेदनमाथि सुनुवाइ गर्दै न्यायाधीश मोहन सुवेदीको इजलासले आरोपपत्र संशोधन गर्न आदेश दिएको पर्साका जिल्ला न्यायाधिवक्ता मोहनप्रसाद गुप्ताले जानकारी दिए।
अदालतको आदेशसँगै अब सानो पाइला सहकारी ठगी मुद्दामा आरोपित र पीडित पक्षबीच मिलापत्र गर्ने कानुनी बाटो खुलेको छ। दुवै पक्षबीच सहमति भएमा मुद्दा फिर्ता लिन सकिने व्यवस्था रहेको छ।
सरकारी वकिलको कार्यालय, पर्साले २०८२ असार १ गते सानो पाइला सहकारीको रकम हिनामिना गरेको आरोपमा रवि लामिछानेसहित २९ जनाविरुद्ध मुद्दा दायर गरेको थियो। उक्त मुद्दामा आरोपितहरूबाट ५ करोड ७४ लाख रुपैयाँ बिगो असुल गर्न मागदाबी गरिएको थियो।
संगठित अपराधको आरोप हटेसँगै सहकारी ठगीसम्बन्धी मुद्दाको कानुनी प्रक्रियामा नयाँ मोड आएको छ भने सम्भावित मेलमिलापको बाटो समेत खुलेको छ।
