काठमाडौं – सरकारले नेपाल धितोपत्र बोर्ड (सेबोन) को अध्यक्ष पदमा डा. गोपालप्रसाद भट्टलाई नियुक्त गरेको छ।
शुक्रबार बसेको मन्त्रिपरिषद् बैठकले लामो समयदेखि रिक्त रहेको अध्यक्ष पदमा कैलालीका डा. भट्टलाई नियुक्त गर्ने निर्णय गरेको हो। नयाँ अध्यक्ष नियुक्तिसँगै धितोपत्र बजारको नियमन, अनुगमन तथा विकासका कार्यले थप गति लिने अपेक्षा गरिएको छ।
अध्यक्ष नियुक्तिका लागि सरकारले राष्ट्रिय योजना आयोगका उपाध्यक्ष डा. गुणाकर भट्ट को संयोजकत्वमा तीन सदस्यीय सिफारिस समिति गठन गरेको थियो। उक्त समितिले योग्य उम्मेदवारहरूको मूल्यांकन गरी सरकारलाई सिफारिस गरेको थियो।
यी हुन् मन्त्रिपरिषद् बैठकका निर्णयहरु :
१. नेपाल विशेष सेवा ऐन, २०४२ को साविकको व्यवस्था जोगाउने सम्बन्धी विधेयक संघीय संसद्समक्ष पेस गर्न स्वीकृति दिने।
२. नेपाल धितोपत्र बोर्डको अध्यक्ष पदमा डा. गोपालप्रसाद भट्ट (कैलाली) लाई नियुक्त गर्ने।
३. सहकारी सम्बन्धी प्रचलित कानुनलाई संशोधन र एकीकरण गर्न विधेयक तर्जुमाका लागि सिद्धान्त स्वीकृत गर्ने।
४. बचत तथा ऋण सहकारी नियमन तथा सुपरिवेक्षण सम्बन्धमा व्यवस्था गर्न बनेको विधेयक तर्जुमाका लागि सिद्धान्त स्वीकृति गर्ने।
५. राष्ट्रिय सेवा दल सम्बन्धी कानुनलाई संशोधन र एकीकरण गर्न बनेको विधेयक संघीय संसदमा पेस गर्न स्वीकृति प्रदान गर्ने।
६. संघीय संसद्समक्ष देहायका प्रतिस्थापन विधेयकहरू पेस गर्न स्वीकृति प्रदान गर्ने ।
क) सहकारी ऐन, २०७४ लाई संशोधन गर्न बनेको विधेयक
ख) सार्वजनिक खरिद ऐन, २०६३ लाई संशोधन गर्न बनेको विधेयक
ग) सम्पत्ति शुद्धीकरण (मनि लाउन्डरिङ) निवारण ऐन, २०६४ लाई संशोधन गर्न बनेको विधेयक
घ) स्वास्थ्य विज्ञान प्रतिष्ठान सम्बन्धी नेपाल ऐनलाई संशोधन गर्न बनेको विधेयक।
