काठमाडौं । नेपाली कम्युनिष्ट पार्टी (नेकपा) का संयोजक पुष्पकमल दाहाल ‘प्रचण्ड’ले विशिष्ट व्यक्तिहरूलाई विनाकारण पक्राउ गर्ने क्रम नरोकिए सरकारले त्यसको ठूलो राजनीतिक मूल्य चुकाउनुपर्ने चेतावनी दिनुभएको छ ।
सोमबार संघीय संसद् भवन, सिंहदरबारमा सञ्चारकर्मीसँग कुरा गर्दै प्रचण्डले सुरक्षा चुनौती देखाएर गरिने पक्राउको औचित्यमाथि प्रश्न उठाउनुभएको हो ।
उहाँले ‘सुरक्षा थ्रेट’ रहेको भनिए पनि त्यसको नाममा पक्राउ गर्नु उपयुक्त नभएको बताउनुभयो । वास्तविक रूपमा सुरक्षा खतरा भए सम्बन्धित व्यक्तिको सुरक्षामा थप सुरक्षाकर्मी परिचालन गर्नुपर्ने उहाँको तर्क थियो ।
प्रचण्डले सरकारको पछिल्लो व्यवहार ‘छोरी पिटेर बुहारी तर्साउन खोजे’जस्तो नियतमा अघि बढेको भए त्यसको परिणाम सरकारकै लागि घातक हुने चेतावनी दिनुभयो ।
विशिष्ट व्यक्तिहरूलाई पक्राउ गर्ने क्रम जारी राखिए त्यसको मूल्य सरकारले धेरै ठूलो चुकाउनुपर्ने उहाँले बताउनुभयो ।
